Сурхондарё вилояти ИИБ Денов туман “Катта карши” маҳалласида онаси томонидан аёвсиз калтакланган қизчанинг ҳолати акс этган видеога расмий муносабат билдирди.
Маълум қилинишича, ҳолат юзасидан Денов туман Ички ишлар бошқармаси томонидан суриштирув ишлари олиб борилган. Аниқланишича, туманда яшовчи М.А.исмли аёлнинг Х.С. исмли қизи 22 апрель куни соат 13:00 ларда кўчага ўртоқлари билан ўйнаш мақсадида чиққан. Орадан бироз вақт ўтганидан кейин қиз онаси уни чақирганини эшитиб, қўрққанидан яширинган. Аёл қизини тахминан 40 дақиқа кўчадан қидирган ва у топилганидан кейин уйига олиб кириб, таёқча билан уриб, калтаклаган.
Ҳозирги вақтда Х.С. исмли қиз Денов туман марказий касалхонасида даволаниб келмоқда.
Ушбу ҳолат юзасидан, Денов тумани ИИБ ҳузуридаги Тергов бўлими томонидан терговга қадар текширув ҳаракатлари олиб борилмоқда. Терговга қадар текширув ҳаракатлари Сурхондарё вилояти Ички ишлар бошқармаси томонидан назоратга олинган.
Март охирларида Тошкент шаҳар Янгиҳаёт туманида спортчи эркак ўз хотини ва боласини аёвсиз калтаклагани ҳақида хабар берилган эди. Кейинроқ мазкур ҳолат бўйича янги тафсилотлар очиқланган. Шунингдек, Самарқандда фарзандини қийноққа солган аёлга нисбатан жиноят иши қўзғатилганди.
Изоҳ (0)