Тошкент шаҳар мактабгача ва мактаб таълими бошқармаси ўқувчи қизлар бошқа бир қизни калтаклагани тасвирланган видеога муносабат билдирди.
Ижтимоий тармоқларда 4-5 нафар қиз тенгдошини уриб-тепиб, уни тиз чўктиришга урингани тасвирланган видео тарқалди. Аниқланишича, видеода акс этган воқеа 25 апрель куни соат 15:00 ларда Шайхонтоҳур тумани “Самарқанд дарвоза” МФЙ, Учлола кўчаси 4-уйнинг ертўла қисмида содир бўлган.
Шу тумандаги 82-сонли умумтаълим мактаби 7-синф ўқувчиси С.С. дугоналари Ч., С., Т. ва Г. билан бирга мазкур мактабнинг 8-синф ўқувчиси К.М.ни дўппослаган ҳамда тасвирга олинган видеони ўзининг Instagramъдаги саҳифасига жойлаб тарқатган.
Ҳозирда ҳолат юзасидан Шайхонтоҳур тумани ИИО ФМБ ходимлари томонидан тергов-суриштирув ишлари олиб борилмоқда.
“Афсуски, кейинги пайтларда улар иштирокида содир бўлаётган хунук воқеалар катта-ю кичикни бирдек ранжитиб, ташвишлантирмоқда. Ҳеч бир замонда ўзбек қизларининг бундай аҳволга тушмагани бугун барчамизнинг дилимизни хира қилиб, миллатимиз шаънига доғ бўлмоқда. Бу эса нафақат педагоглар, балки ота-оналаримиз зиммасига ҳам фарзандларимиз, жумладан, қизларимизнинг тарбиясида катта масъулият юклайди”, — дейилади бошқарма муносабатида.
Бир неча кун олдин Тошкент шаҳри Янгиҳаёт туманида 12 апрель куни икки қиз бошқа бир қизни “самосуд” қилгани ҳақида хабар берилган эди.
Жабрланувчи бир беҳаё суратдаги қизни ўзидан юқори синфда ўқувчи қиз эканини айтиб, мактабда миш-миш тарқатган. Буни эшитган қиз эса уни дўппослаган. Ҳолат юзасидан Янгиҳаёт тумани ички ишлар органи фаолиятини мувофиқлаштириш бўлими тергов бўлими томонидан Жиноят кодексининг 277-моддаси (безорилик) билан жиноят иши қўзғатилган.
Изоҳ (0)