Ижтимоий тармоқларда Андижон вилоятининг Асака туманида шифокор беморнинг турмуш ўртоғи ва уч-тўрт нафар эркаклар томонидан калтаклангани ҳақида хабарлар тарқалди. Вилоят соғлиқни сақлаш бошқармаси ахборот хизмати “Дарё”га ушбу ҳолат юзасидан маълумот берди.
Таъкидланишича, 2023 йилнинг 23 апрель куни шифокор Б.С. Асака туман тиббиёт бирлашмаси шошилинч қабул бўлимида навбатчиликни ўтаётганида тунги соат 24:00 лар атрофида тез тиббий ёрдам машинасида ҳушсиз ҳолатда олиб келинган бемор Д.Д.га зарурий муолажалар буюриб, унинг атроф муҳитга реакциясини текширган.
Бемор ҳушига келгач, ҳушсиз ҳолатда ётганида шифокор унга тегажоғлик қилган деган важ билан жанжал чиқарган. Даҳанаки жанжалдан сўнг бемор ва турмуш ўртоғи шифокорнинг телефон рақамини олиб кетиш билан кифояланган. Бироқ эртаси куни аёлнинг турмуш ўртоғи ва у билан бирга келган уч-тўрт нафар эркак Асака туманидаги “Ҳаёт шифо” хусусий шифохонасида навбатчилик ўтаётган Б.С.ни телефон орқали кўчага чақириб, аёвсиз калтаклаган.
Б.С. олинган жароҳатлар оғриқлари кучайганлиги сабабли республика шошилинч тез ёрдам илмий маркази Андижон филиали травматология бўлимига олиб борилган. Дастлабки текширувларга асосан унга мия чайқалиши, чап қулоқ шикастланиши ташхиси билан нейрохирургия бўлимига ётқизилган.
Ҳолат юзасидан терговга қадар суриштирув ишлари олиб борилмоқда.
Аввалроқ, Андижонда 64 ёшли шифокор беморнинг эри томонидан калтаклангани ҳақида хабар қилинганди.
Изоҳ (0)