Швеция тадқиқотчи ракетаси тасодифан Норвегияга қулаб тушди

Швециянинг Esreynj космодромидан учирилган тадқиқотчи ракета кутилмаганда Норвегияга қулаб тушди. Бу ҳақда Швеция космик корпорацияси хабар берди.

“Ракета траэктория бўйлаб режалаштирилган ҳудуддан бироз узоқроққа, ғарбга учиб кетди ва парвозни тугатгандан сўнг 15 километр Норвегия ичкарисига қулади”, — дейилади корпорация баёнотида.

Қурилма 250 километр баландликка кўтарилган, у ерда нол тортишиш кучида микрогравитация тажрибалари ўтказилган. Ташкилот маълумотларига кўра, ракета ва унга ортилган фойдали юк режалаштирилган қўниш жойидан тахминан 40 километр шимоли-ғарбда жойлашган тоғ тизмасига, тахминан 1000 метр баландликдаги жойга қулаган. “Фойдали юкни олиб чиқиш бўйича ишлар олиб борилмоқда. Ноодатий парвоз траэкториясининг техник тафсилотларини аниқлаш бўйича текширув бошланган”, — дейилади Швеция космик корпорацияси хабарида.

Норвегия Ташқи ишлар вазирлиги NRKъга маълум қилишича, расмийлар Норвегия чегарасидаги ҳар қандай рухсат этилмаган ҳаракатларга жиддий ёндашади. “Бундай ракетанинг қулаши катта зарар келтириши мумкин бўлган жуда жиддий ҳодиса. Чегаранинг бу тарзда бузилиши кузатилганда, айбдорлар Норвегиянинг тегишли органларига зудлик билан хабар бериши муҳим”, — деди вазирлик вакили.

Унинг аниқлик киритишича, Норвегия ҳукуматига ракета қўнган ҳудудга бирор зарар етгани ҳақида хабар келиб тушмаган. “Бундай ракеталарнинг қолдиқлари ёнилғи ёки бошқа заҳарли моддалар билан ифлосланган бўлиши мумкин. Шунинг учун рухсат этилмаган шахслар ҳалокат жойига яқинлашмаслиги зарур”, — дея таъкидлади Норвегия ТИВ вакили.

Парвоз амалга оширилган Esreynj космик маркази раҳбарининг айтишича, Норвегия томони воқеа ҳақида хабардор қилинган. Унинг қўшимча қилишича, Норвегияга қулаган ракетада 300 килограммлик фойдали юк бор.