Бирлашган Миллатлар Ташкилоти бош котиби ташкилот штаб-квартирасининг жойлашуви тўғрисида қарор қабул қилиш ваколатига эга эмас, буни БМТга аъзо давлатлар ҳал қилиши керак. БМТ раҳбарининг матбуот котиби Стефан Дюжаррик ташкилот бош офисини Нью-Йоркдан кўчириш таклифи ҳақидаги саволларга шундай жавоб берди.
“БМТ штаб-квартирасининг қаерда жойлашиши ёки йиғилишлар қаерда ўтказилиши масаласи бош котибнинг эмас, балки аъзо давлатларнинг қарори”, — дея жавоб берди матбуот котиби.
Аввалроқ Россия Ташқи Ишлар вазирлиги халқаро ташкилотлар департаменти директори Пётр Иличев БМТ штаб-квартирасини Нью-Йоркдан нейтралроқ нуқтага, масалан, Женева ёки Венага кўчиришни таклиф қилган эди. Бунгача у АҚШни ташкилот штаб-квартираси жойлашган давлат мақоми тўғрисидаги келишувга риоя қилмаётганликда айблаган.
Россия ташқи ишлар вазири Сергей Лавров ҳам бу фикрни қўллаб-қувватлади. “Менимча, бу яхши бўларди”, — деб жавоб берди Лавров журналистларнинг ҳозир бунинг вақтими деган саволига.
Швейцария ТИВ вакили Паола Черезетти БМТ штаб-квартирасини Женева ёки Венага кўчириш ғоясини изоҳлар экан аввало, бундай қарорнинг самарадорлигини баҳолаш талаб этилишини айтди.
Апрель ойида Бирлашган Миллатлар Ташкилоти Хавфсизлик кенгашига Россия раислик қилмоқда. Россия ташқи ишлар вазири Сергей Лавров бошчилигидаги делегация 24 ва 25 апрель кунлари БМТ Хавфсизлик кенгаши мажлисларида иштирок этиш учун АҚШга борди. Аммо АҚШ Лавровга Нью-Йорк сафарида ҳамроҳлик қиладиган россиялик журналистларга виза бермади. Лавров Россия буни унутмаслигини айтди. Лавровнинг ўзига ҳам узоқ вақт виза берилмаган.
Изоҳ (0)