Алексей Навалнийнинг айтишича, экстремизм бўйича жиноий иш доирасида унга қарши алоҳида “террорчилик иши” қўзғатилган ва бу ишда ҳукмни ҳарбий суд чиқаради.
“Улар менга 30 йиллик қамоқ жазосини назарда тутадиган бемаъни айбловларни қўйишди. Терговчи Видюков кеча бу ишдан террорчилик иши алоҳида ажратиб олинганини айтди, мен қамоқда ўтириб терактлар содир этаётган эканман. Бу иш бўйича мени ҳарбий суд алоҳида суд қилади”, — деди сиёсатчи Москванинг Басманний судида видеоалоқа орқали гапирар экан. “Бу ишда мени 30 йил кутмоқда, балки кейинги ишда умрбод қамоқ жазосини беришар”.
Навалнийнинг сўзларидан унинг сафдошлари, шунингдек, “ТАСС” агентлиги иқтибос келтирди.
Алексей сегодня ❤️#СвободуНавальному pic.twitter.com/UfAKEyegUn
— Команда Навального | ФБК (@teamnavalny) April 26, 2023
26 апрель куни Басманний судида йиғилиш бўлиб ўтди, унда Алексей Навалнийга экстремизм бўйича жиноий иш материаллари билан танишиб чиқиш учун 10 кун вақт беришга қарор қилинди. Суд тергов сирини рўкач қилиб, тингловчилар ва матбуот учун йиғилишни ёпиб қўйган. Навалний ва унинг ҳимоячиси айтишича, жиноий иш 196 банддан иборат.
Алексей Навалний 2021 йилдан бери Владимир вилоятидаги 6-сонли ахлоқ тузатиш колониясида жазо ўтамоқда. 2022 йилнинг март ойида у фирибгарлик ва судга ҳурматсизлик қилганликда айбланиб, яна тўққиз йилга қаттиқ тартибли колонияга ҳукм қилинган.
2022 йил октябрь ойида сиёсатчи ўзига қарши янги жиноий иш қўзғатилганини маълум қилди. Россия Тергов қўмитаси уни терроризм ва экстремизмни тарғиб қилиш, экстремистик фаолиятни молиялаштириш ва натсизмни реабилитация қилишда айблади.
Изоҳ (0)