Суданнинг ҳокимиятдан ағдарилган президенти Умар ал-Башир армия ва Тезкор қўллаб-қувватлаш кучлари ўртасида тўқнашув бошланганидан кейин Хартумдаги ҳарбий госпиталда сақланмоқда. Бу ҳақда Al Jazeera хабар берди.
Маълум қилинишича, Ал-Башир ва 30 га яқин бошқа маҳбуслар Кобер қамоқхонасидаги тиббий ходимлар тавсиясига асосан Алия госпиталига кўчирилган. Ал-Башир собиқ ҳукуматининг бошқа аъзолари билан бирга Хартумдаги қамоқхонада сақланаётганди.
Икки ҳарбий гуруҳ ўртасидаги жанглар пайтида қамоқхона ҳужумга учраган, бу эса якшанба куни минглаб маҳбусларнинг қамоқдан қочиб кетишига олиб келган.
“Баширнинг оила аъзолари мамлакатда тўқнашувлар тугаганидан кейин у судга бориши ва айбсизлигини исботлаши кераклигини айтди”, — дейди Al Jazeera мухбири Ҳиба Морган.
2019 йил апрелдаги ҳарбий тўнтаришдан сўнг Умар ал-Башир ҳокимиятдан четлатилган. У 30 йилдан ортиқ давлат раҳбари лавозимида ишлаган. Тўнтариш бутун мамлакатни қамраб олган норозилик намойишлари фонида юз берди. Намойишчилар ал-Башир ҳукуматидан нархларни пасайтиришга эришишни, шунингдек, ҳар ҳафта содир бўладиган электр таъминотидаги узилишлар муаммосини ҳал қилишни талаб қилган.
2008 йилнинг 21 июлида Гаага суди ал-Баширни Дарфурдаги можарога алоқадор геноцидда айблаб, ҳибсга олиш учун ордер берди. Шундай қилиб, ал-Башир халқаро адлия органи томонидан айбланган дунёдаги биринчи амалдаги президентга айланган.
Жорий йилнинг апрель ойи ўрталарида суверен кенгаш (мамлакат бошқарув органи)ни бошқараётган Абдул Фаттоҳ ал-Бурхон ва унинг ўринбосари Муҳаммад Дагло ўртасидаги келишмовчилик туфайли мамлакатдаги вазият кескинлашди. 15 апрель куни эрталаб Мерое шаҳридаги ҳарбий база яқинида ва пойтахт Хартумда армия ҳамда тезкор ҳаракат кучлари ўртасида тўқнашувлар бошланди.
21 апрель куни Жаҳон соғлиқни сақлаш ташкилоти (ЖССТ) вакили Маргарет Харрис брифингда Судандаги тўқнашувларда ҳалок бўлганлар сони 400 кишидан ошганини, мамлакатда 3,5 мингдан ортиқ киши жароҳатланганини айтди.
Изоҳ (0)