Бирлашган Миллатлар Ташкилоти (БМТ) экспертлари Ҳиндистон ва Хитой аҳолининг оммавий қаришига олдиндан тайёргарлик кўриши кераклигини айтди. Бу ҳақда Bloomberg хабар берди.
Агар давлатлар ҳозир буни амалга оширмаса, келажакда соғлиқни сақлаш ва ижтимоий суғурта соҳасида жиддий муаммоларга дуч келиши мумкин. Яқин келажакда Ҳиндистон аҳоли сони бўйича Хитойни ортда қолдириши кутилмоқда. Бироқ ҳозирда ҳар икки давлат ҳам аҳолининг қариши билан боғлиқ мураккаб муаммоларга дуч келмоқда.
БМТнинг 24 апрель куни эълон қилинган ҳисоботида келтирилишича, 65 ёшдан ошганлар сони Ҳиндистон ва Хитойда қарийб икки баробар ортади. Буларнинг барчаси келгуси бир неча йил ичида содир бўлади ва соғлиқни сақлаш, ижтимоий суғурта тизимларига қўшимча босим ўтказади.
Шу билан бирга, Ҳиндистон аҳолиси келгуси бир неча ўн йилликларда ўсади, Хитой аҳолиси эса камаяди. Бу йил мамлакат аҳолиси 1960 йиллардан бери биринчи марта камайди. Охирги уч йил ичида Хитойнинг меҳнатга лаёқатли аҳолиси 41 миллиондан ортиқ кишига қисқарди, бу тахминан Германиядаги барча меҳнатга лаёқатли одамлар сонига тенг.
“Иккала давлат ҳам ижтимоий ҳимояни, сони ортиб бораётган кексаларнинг саломатлиги ва фаровонлигини таъминлаш бўйича чора кўриши керак”, — дейилади БМТ ҳисоботида.
Изоҳ (0)