Беларусь озодлиги Украинанинг Россия билан урушда ғалаба қозонишининг зарурий шартидир, чунки Украина ва Беларусь тақдири бир-бири билан чамбарчас боғлиқ. Бу ҳақда Беларусь мухолифати етакчиси Светлана Тихановская Берлиндаги Науман жамғармасида “Озодлик муҳокамаси” номли йиллик тадбирида айтиб ўтди.
“Озод Украинасиз озод Беларусь бўлмайди, озод Беларуссиз эса Украина хавфсиз бўлмайди”, — деди у. Тихановская, шунингдек, Украина томонида юзлаб беларус кўнгиллилари жанг қилаётганидан фахрланишини таъкидлади. Унинг сўзларига кўра, Россиянинг расмий иттифоқчиси ҳисобланган Беларусдан камида 18 нафар кўнгилли Украинани ҳимоя қилишда ҳалок бўлган.
Тихановская Беларусдаги Россияга қарши партизанлик ҳаракатларини эслади. “Биргина 2022 йилда Беларусь темирйўл партизанлари рус қўшинларини тўхтатиш учун 80 та қўпорувчилик ҳаракатларини амалга оширди”, — деди Беларусь президентлигига собиқ номзод. Унинг сўзларига кўра, “Россиянинг геноцид урушини қўллаб-қувватловчи (Александр) Лукашенко режимини украиналиклар билан биргаликда жангари империяни даф этаётган беларус халқидан фарқлаш керак”.
Тихановская Беларусда 15 йилга озодликдан маҳрум қилинган
Март ойи бошида Минск шаҳар суди Тихановскаяни сиртдан 15 йиллик қамоқ жазосига ҳукм қилди. Тергов унга бир вақтнинг ўзида ўнта айблов қўйди: унвон ва ҳокимиятни рухсатсиз тортиб олиш, миллий хавфсизликка қарши ҳаракатларда хорижий давлатга ёрдам бериш, ҳокимиятни эгаллаб олиш учун фитна уюштириш, нафрат уйғотиш, экстремистик тузилма яратиш, Марказий сайлов комиссияси ишига тўсқинлик қилиш ва бошқалар.
Тихановскаянинг сўзларига кўра, у Беларусь ҳукумати бу ҳукм билан унга нима демоқчи бўлгани ҳақида бош қотираётгани йўқ. У “ҳукм билан ёки усиз сиёсий маҳбусларни озод қилиш ва мамлакатни демократик ўзгаришлар сари етаклаш учун барча имкониятларни ишга солишда” давом этмоқчи.
Изоҳ (0)