Чеченистон раҳбари Рамзан Қодировнинг жияни, 26 ёшли Ҳамзат Қодиров унинг куч блокидаги маслаҳатчи-ёрдамчиси бўлди. Бу ҳақда Чеченистон миллий сиёсат, ташқи алоқалар, матбуот ва ахборот бўйича вазири Ахмед Дудаев ўзининг Telegram-каналида маълум қилди.
Дудаевнинг сўзларига кўра, Ҳамзат Қодировга ишониб топширилган ҳар қандай йўналиш “динамик ривожланишни бошлайди”. У, шунингдек, Ҳамзатни Рамзан Қодировнинг “аъло даражадаги иш бошқарувчиси” ва “содиқ иттифоқчиси” деб атади.
Февраль ойи бошида Қодиров жияни республика мулк ва ер муносабатлари вазири, бош вазир ўринбосари лавозимига тайинланганини маълум қилганди. Уч йил олдин, ўша пайтда 23 ёшда бўлган Ҳамзат Қодиров Чеченистон Спорт вазирлигини бошқарган.
Қариндошларининг Чеченистон ҳукуматига тайинланишига изоҳ берар экан, Қодиров шундай деган эди: “Қайси муассаса ва қайси лавозимда бўлмасин, қариндошларимга ўн баробар кўп талаб қўйилган, чунки улар менга раҳмат айтиш учун эмас, менга қарамай ишлаётганини исботлаши керак. Кимга ишонсам, шуни тайинлайман”.
BBC рус хизматининг 2018 йилги ҳисоб-китобларига кўра, Чеченистондаги 158 нафар юқори мартабали амалдорнинг 30 фоизи Рамзан Қодировнинг қариндошлари, 23 фоизи қишлоқдошлари, яна 12 фоизи Чеченистон раҳбарининг дўстлари ва уларнинг қариндошларидир. 2021 йил октябрь ойида Қодировнинг қизи Айшат Чеченистон маданият вазири бўлганди. Ўша пайтда у 22 ёшда эди.
Маълумот ўрнида, Ҳамзат — Рамзан Қодировнинг марҳум акаси Зелимхон Қодировнинг ўғли.
Изоҳ (0)