Туркия президенти Ражаб Тоййиб Эрдўғон Туркия Қуролли кучларига мамлакатда ишлаб чиқарилган янги Alatay (“Олтай”) танкини синовдан ўтказиш учун топширганини маълум қилди. Бу ҳақда маҳаллий Yeni Şafak нашри ёзмоқда. Танкни топшириш маросими ва Туркия раҳбарининг чиқиши Сакария вилоятидаги заводда бўлиб ўтди.
“Бизнинг янги Alatay танкимиз ўн йил аввал тақдим этилган прототипдан бутунлай фарқ қилади ва ундан устун имкониятларга эга”, — деди Эрдўғон.
Унинг сўзларига кўра, танкнинг янги версиясида зирҳ дизайни яхшиланган ва Аккор фаол ҳимоя тизими қўшилган. Синовлардан кейин танкларни давомий ишлаб чиқариш бошланиши режалштирилган, дея қўшимча қилди Туркия президенти.
“Ҳозир Туркия бу соҳада (қуруқлик воситалари ишлаб чиқаришда) дунёда биринчи ўринни эгаллади ва кўплаб армияларга ўз ҳарбий маҳсулотларини етказиб берувчи давлатга айланди”, — деди Эрдўғон.
Alatay танкининг янги версиясини Туркиянинг BМC Defense компанияси ишлаб чиқарди. Компания раҳбариятининг маълум қилишича, янги моделдаги яхшиланишлар сўнгги йигирма йил давомида жанговар машғулотлардан олинган сабоқлар асосида амалга оширилган.
Alatay’нинг янги хусусиятлари орасида фаол ҳимоя тизими, такомиллаштирилган зирҳ тизими, янгиланган ўт очишни бошқариш тизими, янгиланган танкни бошқариш тизими, концентрланган кучли ток узатиш қурилмаси ва бошқалар мавжуд. Ишлаб чиқарувчи компания менежерининг сўзларига кўра, танк миллий Мудофаа вазирлиги томонидан маъқулланган тақдирда, бир қанча иттифоқчи давлатлар уни сотиб олишга қизиқиш билдирган.
Танкни синовдан ўтказиш 2024 йилда якунланиши режалаштирилган, 2026 йилнинг иккинчи ярмида уни оммавий ишлаб чиқариш бошланади.
Аввалроқ Туркия ўз ҳарбий-денгиз флоти таркибига жанговар дронларни ташишга мўлжалланган дунёдаги биринчи авиаташувчи кема — “Anadolu” десант кемасини қабул қилганди. У хусусан, Bayraktar оиласига мансуб дронларни олиб юради.
Изоҳ (0)