Бортида уч нафар Россия фуқароси бўлган яхта Саудиянинг Жизан шаҳри портидан чиқиб кетганидан сўнг Қизил денгизда ғойиб бўлди, дея хабар бермоқда “ТАСС” Россиянинг Саудия Арабистонидаги элчихонасига таяниб.
“30 дақиқа” (“30 MINUTES”) номли саёҳат кемаси 17 апрель куни денгизга чиқиб, Шарқий Африкадаги Жибути давлатига йўл олган. Ўша куни кема Румейн ороли ҳудудида лангар ташлаган ва радарлардан ғойиб бўлган.
Экипаж билан алоқа йўқ, қайиқдаги автоматик аниқлаш тизимининг транспондерлари ўчирилган.
Яхта капитанининг рафиқаси Надежда Расина “РБК”га айтишича, экипаж Жибутига 19 апрель куни етиб боришни режалаштирган эди. Кема Саудия Арабистони, Эритрея ва Яман ўртасидаги ҳудудда ғойиб бўлган. 20 апрель куни қидирув бошланган.
“Кема ўғирлангани ҳақида маълумот олдик, аммо бизда батафсил маълумот йўқ. Бундай маълумот Саудия Арабистонига келиб тушган, биз улардан билдик”, — деди Расина.
Россиянинг Саудия Арабистонидаги элчихонаси эса рус дипломатлари ҳам, Саудия Арабистони расмийлари ҳам кема қароқчилар томонидан ўғирлаб кетилгани бўйича далил топмаганини таъкидлади.
Изоҳ (0)