Ўзбекистон экспорти 2023 йилнинг биринчи чорагида 5,7 млрд долларни ташкил қилиб, 2022 йилнинг мос даврига нисбатан 2,6 фоизга пасайди. Бу ҳақда Статистика агентлигидан маълум бўлди.
-18.jpg)
Ўзбекистон январь—март ойларида 2,4 млрд долларлик олтин сотди. Бу умумий экспортнинг 42,4 фоизи дегани. Март ойида олтин нархлари рекорд даражада юқорилади ва бу мамлакат учун 1,2 млрд долларлик қимматбаҳо металл сотишга туртки бўлди (январда ҳам 1,2 млрд долларлик олтин сотилган, февралда сотилмаган).
Шунга қарамай, олтин экспорти 2022 йилнинг мос даврига нисбатан 560 млн долларга камайган. Ўшанда мамлакат экспортидаги олтин улуши 51,5 фоизгача етган эди. Кейинчалик шу йилнинг март ойидан бошлаб Ўзбекистон етти ой олтин сотмаган эди.
Экспортда энг юқори ўсиш ичимликлар ва тамаки экспортида кузатилди — 10,2 млн доллардан 28,1 млн долларга (ўсиш 2,7 баробар).
Машиналар ва транспорт ускуналари экспорти 132,6 млн доллардан 160,2 млн долларга кўпайди — икки баробар ўсиш.
Бу чоракда Ўзбекистон хизматлар сотишни ҳам кўпайтирган. Экспорт таркибида хизматлар улуши 9,8 фоиздан 16,5 фоизгача кўпайиб, 940,7 млн долларга етган.
Шунингдек, январь—март ойларида мамлакат саноат товарларини 9,3 фоизга камроқ экспорт қилган.
Экспорт таркибида товарлар улуши 83,5 фоизни ташкил этиб, улар саноат товарлари (17,2 фоиз), озиқ-овқат маҳсулотлари ва тирик ҳайвонлар (6,1 фоиз) ва турли хил тайёр буюмлар (5 фоиз) ҳиссасига тўғри келмоқда.
Изоҳ (0)