Ўзбекистонда март ойида автомобиллар сотуви камайди

Ўзбекистонда март ойида автомобиль бозорида фаолликнинг 0,1 фоизлик пасайиши қайд этилди. Бу ҳақда “Review.uz” хабар бермоқда. 

Умуман олганда, март давомида жами 123,4 минг дона автотранспорт воситаси сотилган, бу бир ой аввалгидан 115 донага кам.

Шу билан бирга, ўтган йилнинг шу даврига нисбатан сотувлар 10 фоизга ошди.

Бирламчи ва иккиламчи автомобиль бозоридаги вазият

Март ойида сотилган енгил автомобиллар сони 4,7 фоизга камайди ва 110,8 мингтани ташкил этди.

Мамлакатда сотувлар бўйича энг катта пасайиш Навоий — 22 фоиз, Бухоро — 19 фоиз ва Қашқадарё — 18 фоиз вилоятларида қайд этилди.

Шу билан бирга, 2022 йил март ойига нисбатан енгил автомобиллар савдоси 7,8 фоизга ошди.

Умуман олганда, жорий йилнинг биринчи чораги натижаларига кўра 345,4 минг енгил автомобиль сотилди, йиллик ўсиш 8,5 фоизни ташкил этди.

Бир ой давомида бирламчи бозорда енгил автомобилларни сотиш 10 фоизга камайди. 2022 йил март ойига нисбатан бирламчи бозордаги пасайиш 16 фоизни ташкил этди.

Шу билан бирга, маҳаллий ишлаб чиқарилган янги енгил автомобиллар савдоси 18,4 минг донани ташкил этди ва 13,8 фоизга камайди.

Иккиламчи автомобиль бозорида сотувларнинг пасайиши бирламчи бозорга қараганда камроқ сезилди.

Бир ой ичида 89 минг дона эски енгил автомобиллар сотилган, бу бир ой олдингига нисбатан 3,3 фоизга кам. Ўтган йилнинг шу даврига нисбатан ушбу тоифадаги автомобиллар савдоси 16 фоизга ошди.

Март ойида сотувлар камайганига биринчи чоракда автомобиль ишлаб чиқариш қисқаргани ҳам сабаб бўлган. 

Ўтган йилнинг биринчи чорагида 68,9 минг дона енгил автомобиль ишлаб чиқарилган бўлса, 2023 йилда бу кўрсаткич 50 минг донагача кескин пасайди.