Ўзбекистон пойтахти супермаркетларида мавсумнинг яна бир янгилиги — эртапишар, халқ орасида “Май олмалари” деб аталадиган олмалар пайдо бўлди. Бу ҳақда EastFruit хабар бермоқда.
Экспертларнинг таъкидлашича, номига қарамай, “Май олмалари” чакана савдода апрель ойининг иккинчи ярмида пайдо бўлган.
Бу мавсумда эртапишар олмалар Ўзбекистон пойтахтидаги супермаркетлар пештахтасида ўтган йилга нисбатан бир неча кун эрта пайдо бўлган. Аммо ўртача нархи 2022 йил апрель ойидагидан 7 баробар арзон.
2023 йилнинг 17 апрелида “Korzinka” супермаркетлар тармоғи чакана нархи 17 990 сўм/кг бўлган “Май олмалари” савдоси бошланганини эълон қилди. Бу янгилик ҳозирча ушбу тармоқнинг Ўзбекистон пойтахти Тошкент шаҳрида жойлашган тўртта дўконида мавжуд.
Таққослаш учун, 2023 йил 19 апрель ҳолатига кўра, оддий ва оммабоп навлар нархи пойтахт супермаркетларида 11 500 сўмдан 18 000 сўм/кг (1,00 дан 1,57 долларгача) оралиғида сотилмоқда.
2022 йилнинг баҳорида “Май олмалари” Тошкент супермаркетларида 20–23 апрель кунлари 1 килограмми 117 000 сўмдан 129 990 сўмгача нархда пайдо бўлган эди.
Ўзбекистонда одатда янги ҳосилнинг эрта олмасини оммавий йиғиш мавсуми май ойининг ўрталаридан бошланади. Айнан шу даврда Ўзбекистон илк бор эртапишар олма экспортини бошлайди. Бироқ экспорт учун олма етказиб беришнинг асосий ҳажми ёз ойларига тўғри келади.
Изоҳ (0)