Бухоро вилоятида автомобиль йўлининг қатнов қисмларида тунги вақтларда тиланчилик қилиб юрган вояга етмаган шахслар аниқланди, деб хабар беради вилоят ИИБ ахборот хизмати.
Қайд этилишича, ИИБ томонидан махсус рейд гуруҳлари ташкил этилиб, тиланчилик қилиб юрган болалар вилоят Вояга етмаган болалар марказига олиб келинган. Уларнинг ота-оналари ҳам муассасага чақирилган.
Аниқланишича, улар Рамазон қўшиғини айтиб, ҳайдовчилардан пул сўраб юрган. “Бу орқали улар автомобиллар ҳаракатланишига халақит бериб, салбий ҳолатлар келтириб чиқариши мумкин”, — дейилади хабарда.
Ўзбекистонда тиланчилик қилиш учун жавобгарлик мавжуд
Аэропортларда, вокзалларда, хиёбонларда, истироҳат боғларида, бозорларда ва савдо мажмуалари ҳудудларида, шунингдек уларга туташ ҳудудларда, автомототранспорт воситаларини вақтинча сақлаш жойларида, кўчаларда, стадионларда, бекатларда, йўлларнинг қатнов қисмида, моддий маданий мерос объектлари жойлашган ҳудудларда, жамоат транспортининг барча турларида ва бошқа жамоат жойларида пул, озиқ-овқат маҳсулотлари ва бошқа моддий қимматликлар беришни фаол тарзда сўраб, тиланчилик билан шуғулланиш БҲМнинг бир бараваридан уч бараваригача (900 минг сўм) миқдорда жарима солишга ёки 15 суткагача муддатга маъмурий қамоққа олишга сабаб бўлади.
Вояга етмаган шахсларни, кекса ёшдаги шахсларни, руҳий ҳолати бузилган, ногиронлиги бўлган ва бошқа шахсларни тиланчилик қилишга жалб этиш, шунингдек, шахсларга алкоголли ичимликларни ёхуд гиёҳвандлик моддалари ёки психотроп моддалар бўлмаган, лекин шахснинг ақл-идрокига таъсир кўрсатувчи моддаларни мажбуран истеъмол қилдирган ҳолда уларни тиланчилик қилишга жалб этиш БҲМнинг беш бараваридан ўн бараваригача (3 миллион сўм) миқдорда жарима солишга ёки 15 суткагача муддатга маъмурий қамоққа олишга сабаб бўлади.
Изоҳ (0)