Ўзбекистонда илк марта “Боланинг соғлом овқатланиш ҳафталиги” бошланди

Соғлиқни сақлаш вазирлиги ташаббуси билан Ўзбекистонда илк бор “Боланинг соғлом овқатланиш ҳафталиги” бошланди. Бу ҳақда вазирлик ахборот хизмати хабар берди.

Қайд этилишича, 19—29 апрель кунлари бўлиб ўтадиган мазкур ҳафталик доирасида 208 та кўп тармоқли марказий поликлиника, 1049 та оилавий поликлиника, 1080 та оилавий шифокор пунктининг 17,3 мингта тиббий бригадалари ва 34,6 минг нафар патронаж ҳамширалари томонидан 1 миллион 878 минг нафардан зиёд 6-23 ойлик болалар учун уй шароитида тайёрланадиган овқатларни бойитиш мақсадида микронутриент кукунлари топширилади.

Унга кўра, ҳар бир тиббий бригада томонидан 6-23 ойлик болалар рўйхатлари асосида микронутреинт кукунларини оналарга етказиш ва уни уй шароитида тайёрлаш бўйича индивидуал машғулотлар ўтказилади.

“6 ойдан 23 ойгача бўлган даврда боланинг соғлом ва ақлий ривожланиши учун темир, А, C, B6 витамини, йод, цинк, фолат каби микроэлементлар жуда муҳим. Шу сабабли вазирлик томонидан юртимиз бўйлаб ”Боланинг соғлом овқатланиш ҳафталиги“ ташкил этилди”, — дейди Соғлиқни сақлаш вазири ўринбосари Элмира Боситхонова.

Мазкур ўн кунлик давомида давлат томонидан ажратилган 50 миллиард сўм маблағ эвазига харид қилинган ва болаларнинг озиқланишида етишмайдиган фаол биологик қўшимчалардан иборат 2 миллион қутига яқин дори-дармонлар ҳар бир ҳудудга белгиланган талабнома асосида етказиб берилади.

Шунингдек, ҳафталик давомида ёш оналар ва боланинг оила аъзолари билан 6 ойликкача гўдакларни мутлақ она сути билан боқишнинг аҳамияти ҳамда 6 ойликдан бошлаб чақалоқларни қўшимча овқатлар билан тўғри овқатлантириш ва уларни парваришлаш бўйича суҳбатлар ўтказиш режалаштирилган.

Тарғибот ишлари Соғлиқни сақлаш вазирлиги томонидан тайёрланган “Бир ёшгача болалар овқатланиши” ва “Болани парваришлаш ва ривожланиши учун услубий қўлланмалар" асосида ташкил этилади.

Бундан ташқари, тиббиёт бригадалари учун Жаҳон соғлиқни сақлаш ташкилотининг “Гўдак ҳаётининг дастлабки 1000 кунлиги” мавзусида болани тўғри овқатлантириш ва кўкрак сути билан боқишнинг аҳамиятига бағишланган семинарлар ўтказиш ҳам кўзда тутилган.