Ўзбекистонда йилига аҳоли жон бошига қанча шакар истеъмол қилиниши маълум бўлди

Ўзбекистон дунёдаги шакар истеъмоли ўртача бўлган давлатлар қаторига киради. Бу ҳақда Landgeist хабар берди.

“Европа ва Шимолий Америка аҳолиси дунёда энг кўп шакар истеъмол қиладиган халқ бўлса-да, айрим Осиё, хусусан, Яқин Шарқ давлатлари ҳам энг кўп шакар истеъмол қиладиган мамлакатлар ҳисобланади”, — дейилади хабарда.

Маълумотларга кўра, Баҳрайн (44,3 килограмм) аҳоли жон бошига шакар истеъмоли бўйича Осиёда биринчи ўринда туради ва дунёдаги энг юқори кўрсаткичга эга давлатлардан биридир. Ливан (43,4 килограмм) ва Малайзияда (41,6 килограмм) ҳам шакар истеъмоли жуда юқори.

Энг паст кўрсаткичлар Мянма (2,9 килограмм), Шимолий Корея (4,5 килограмм) ва Бангладешда (6,3 килограмм) қайд этилган.

Ўзбекистонда эса йилига аҳоли жон бошига 17,8 килограмм шакар истеъмол қилинади. Бу кўрсаткич бўйича мамлакат Туркманистон (18,7 килограмм), Тожикистон (16,8 килограмм) ва Япония (17,2 килограмм) билан бир қатордан жой олган.

Шакар глюкоза шаклида тез энергия беради, у организм томонидан дарҳол ҳазм қилинади ёки кейинчалик фойдаланиш учун сақланади. Бу озиқ-овқат ва ичимликлар таъмига ҳам таъсир қилади. Шу билан бирга, шакарни ҳаддан ташқари кўп истеъмол қилиш соғлиқ учун бир қатор салбий таъсирларга, масалан, вазн ортиши, тишларнинг парчаланиш хавфи ортиши ва қонда шакар миқдорининг кўпайиши, оқибатда 2-тоифа диабет юзага келиши каби баъзи сурункали касалликларга олиб келиши мумкин.

Ўзбекистонда шакар маҳсулоти захираси

Ички бозорни шакар маҳсулоти билан узлуксиз таъминлаш мақсадида маҳаллий шакар ишлаб чиқарувчилар томонидан ишлаб чиқариш қувватларини модернизация қилиш ишлари олиб борилмоқда ва биринчи босқичида (1 майга қадар) шакар ишлаб чиқариш қувватларини ўтган йилга нисбатан 25 фоизга оширилиши, натижада суткасига 2,5 минг тоннагача шакар ишлаб чиқарилиши режалаштирилган. Бунда, йиллик шакар ишлаб чиқариш 600 минг тоннадан 1 миллион тоннагача ошиши кутилмоқда.

Рақобатни ривожлантириш ва истеъмолчилар ҳуқуқларини ҳимоя қилиш қўмитасига кўра, республика аҳолисини етарли миқдорда ва мақбул нархларда шакар ва ун маҳсулотлари билан таъминлаш бўйича ҳукумат томонидан зарур чоралар кўрилган.

Бугунги кунда аҳолига шакар 11 500—14 000 сўмдан, айрим олис ҳудудларда 12 000—15 000 сўмгача чакана нархларда реализация қилинмоқда.