Тошкент шаҳри масжидларида Рамазон ҳайити намози ўқилиши муносабати билан махсус автобус йўналишлари ташкил этилмоқда, деб хабар беради “Тошшаҳартрансхизмат”.
Қайд этилишича, ушбу махсус автобус йўналишлари пойтахт масжидларда Рамазон ҳайит намози ўқилиши муносабати билан, мазкур масжидларга ташриф буюрувчи фуқароларга қулайлик яратиш, йўлларда пайдо бўладиган тирбандликлар олдини олиш ҳамда ҳайит байрамида сифатли, хавфсиз жамоат транспорти хизматини кўрсатиш мақсадида ташкил этилмоқда.
Мазкур автобус йўналишлари соат 04:00 дан 07:00 га қадар ҳаракатланган ҳолда фуқароларнинг масжидларга келиб кетишлари учун хизмат кўрсатади.
Ўзбекистонда Рамазон ҳайити 21 апрелга тўғри келиши мумкин
Ўзбекистонда Рамазон ҳайити куни 2023 йил 21 апрель, жума кунига тўғри келиши ҳақида дастлабки хулосалар қилинмоқда. Уламолар ва малакали мутахассислардан иборат ишчи гуруҳ Рамазон ҳайити куни — янги Шаввол ҳилолини астрономик таҳлиллар ҳамда хорижий давлатлардаги мутахассислар билан ҳамкорликда кузатиб бормоқда. Ҳатто ишчи гуруҳ вакиллари АҚШ, Туркия, Жанубий Корея ва Россия минтақаларида ҳам кузатиш ишларини олиб бормоқда.
Хориждаги нуфузли астрономия марказлари ва Фанлар академияси қошидаги Астрономия институтидан олинган маълумотларга кўра, 2023 йил Рамазон ҳайити куни, яъни Шавволнинг янги ой фазаси шу йил 20 апрель, пайшанба куни Тошкент вақти билан соат 09:12 да, Саудия Арабистони вақти билан эса 07:12 да содир бўлади. Астроном олимлар хулосасига кўра, шу куни Шаввол ойи ҳилоли Ўзбекистон ҳудудида кўринмаса-да, лекин дунёнинг айрим минтақаларида кўриш мумкин бўлади.
Изоҳ (0)