Германия собиқ канцлери Ангела Меркель 17 апрель куни Германиянинг олий давлат мукофоти – “Буюк хизматлари учун” Федерал Хоч ордени билан тақдирланди. Ундан олдин бу мукофотни фақат икки нафар собиқ канцлер олган, деб ёзади Politico.
Меркель мукофотни мамлакат президенти Франк-Вальтер Штайнмаердан қабул қилиб олди. Штайнмаер ўзининг ярим соатлик нутқида Меркелни Германияни оғир дамлардан олиб ўтган, жумладан 2008 йилдаги молиявий инқироз ва 2015 йилдаги қочқинлар инқирозини муваффақиятли енгган “мисли кўрилмаган сиёсатчи” деб атади.
Собиқ канцлернинг ўзи бор-йўғи беш дақиқа гапириб, таклиф ва мукофот учун миннатдорлик билдирди, шунингдек, сиёсатнинг яхши томони ҳам борлигига ишонч билдирди.
Бунга қадар Федерал хоч ордени билан фақат канцлер Конрад Аденауэр (1949—1963) ва Гельмут Коль (1982—1998) тақдирланган. Меркелни тақдирлаш маросими Германия президентининг қароргоҳи — Берлиндаги Беллевю саройида бўлиб ўтди. Тадбирда мамлакатнинг амалдаги канцлери Олаф Шольц ҳам иштирок этди. Унинг таъкидлашича, Меркель фаолияти доимо “фактларга мувофиқ, оддий, пафоссиз” бўлган.
Шу билан бирга, Меркелнинг “Иттифоқ” блокидаги айрим партиядошлари (партиядан ҳеч ким тақдирлаш маросимига таклиф қилинмаган) собиқ канцлер сиёсатдан кетганидан сўнг мукофотни бу қадар тез, қолаверса, Россиянинг Украинага босқини фонида қўлга киритганидан норозилигини билдирган.
Жумладан, партиянинг юқори лавозимли ходими Андреас Реддер канцлерлик муддати тугаганидан бир ярим йил ўтиб Меркелнинг Федерал Хоч ордени билан тақдирланганини “нотўғри” деб атади ва унинг Россияга нисбатан позициясини Германиянинг ташқи сиёсатидаги энг ёмон хатоларидан бири деб атади.
Ангела Меркель 2005 йилдан 2021 йилгача Германия канцлери лавозимида ишлаган. 2021 йил сентябрида у парламент сайловларида қатнашишдан бош тортди ва сиёсатдан кетишини маълум қилди.
Изоҳ (0)