“Толибон” ҳаракати Суданда армия ва тезкор кучлар ўртасидаги икки кундирки давом этаётган тўқнашувларга муносабат билдирди. Бу ҳақда “Дарё”нинг Афғонистондаги мухбири хабар берди.
“Толибон” матбуот котиби Забиҳуллоҳ Мужоҳид Суданда давом этаётган тартибсизликлар юзасидан Афғонистон муваққат ҳукумати позициясини билдирди. У томонларни мулоқот олиб боришга чақирди. Мужоҳиднинг айтишича, уруш ечим эмас, урушдан кейин ҳукумат заифлашади.
“Урушга сабаб бўлган муаммолар билан солиштирганда, урушнинг зарари бир неча баравар кўп, бу мамлакат халқи ва суверенитетига таҳдид солмоқда”, — деди у.
Забиҳуллоҳ Мужоҳид Судандаги воқеалардан афсусда эканини билдирди ва зиддиятли томонлардан урушни тезроқ тўхтатишни, сиёсий мулоқот орқали масалага ечим топишни сўради.
Маълумот ўрнида, Суданда 15 апрелдан буён армия ва тезкор қаршилик кучлари ўртасида тўқнашувлар бўлиб ўтмоқда. Ҳар икки томондан 57 дан ортиқ одам ҳалок бўлди, 595 киши яраланди. Улар орасида тинч аҳоли ҳам бор.
Изоҳ (0)