Судан пойтахти Хартумда армия ва РСФ (“Тезкор ҳаракат кучлари”) ўртасида иккинчи кундирки тўқнашувлар давом этмоқда. Бу ҳақда Al Jazeera хабар берди.
Тезкор қўллаб-қувватлаш кучларининг ҳарбийлаштирилган гуруҳлари армия билан жанг қилиб, давлат тўнтаришини амалга оширишга уринмоқда. Томонлар ўртасидаги тўқнашувда камида 56 киши ҳалок бўлган, 595 га яқин киши жароҳатланган. Улар орасида тинч аҳоли ҳам бор. Гувоҳлар оғир артиллериянинг Хартум, қўшни Омдурман шаҳри ва яқин атрофдаги Баҳри устида ишга тушгани ҳақида гапирмоқда.
“Армия РСФ ва бошқа исёнчилар тарқатиб юборилмагунича улар билан музокара олиб бормайди. Биз Хартумда президент саройи яқинида жанглар давом этаётганини гувоҳи бўлмоқдамиз”, — дейди Al-Jazeera мухбири Хеба Морган.
Журналист ҳозир саройни ким назорат қилаётгани номаълумлиги, давлат телевидениеси учун кураш кетаётганини айтди. Армия штаб-квартираси ва Хартум халқаро аэропортини назорат қилаётганини қўшимча қилди.
Ал Майадеен телеканали Судан армияси баёнотига таяниб, Судан ҳарбий-ҳаво кучлари қирувчилари РСФни жанговар ҳаракатларни тўхтатишга мажбурлаш бўйича операциялар ўтказаётгани ҳақида хабар берди. Қўзғолончилар армияни Хартумдаги базаларига ҳар хил қуроллар билан ҳужум қилишда айблади.
“Қўрқдик, шовқин-сурондан 24 соат ухламадик, уй ларзага келди. Сув ва озиқ-овқат, шунингдек, қандли диабетга чалинган дадамга дори-дармон тугаб қолишидан қўрқмоқдамиз. Атрофни ёлғон маълумотлар ўраб олган. Вазият қачон тинчишини билмаймиз”, — деди Хартумда яшовчи Кҳуда исмли аёл.
Аввалги тўқнашувлар
2019 йилда “Тезкор ҳаракат кучлари” (РСФ) ва Судан армияси биргаликда мамлакатдаги ҳарбий тўнтаришда иштирок этганди. Ўшанда мамлакатни 30 йилдан буён бошқариб келаётган президент Умар ал-Башир ҳокимиятдан четлаштирилган. Икки йил ўтиб, 2021 йил октябрь ойида Суданда РСФ тузилмаси ва мунтазам армия иштирокида навбатдаги давлат тўнтариши бўлиб ўтди.
2021 йилги давлат тўнтаришидан буён Суданни Ўтиш даври ҳарбий-фуқаролик маъмурияти — ўтиш даври суверен кенгаши бошқармоқда. Мамлакат армияси ва демократия тарафдори бўлган гуруҳлар РСФънинг Қуролли кучларга қўшилишини талаб қилмоқда. Ушбу масала бўйича музокаралар кескинлик чиқаришда давом этмоқда, шу сабабли апрель ойи бошида Судан суверен кенгаши ва мухолифатчилар ўртасида мамлакатда ўтиш даври фуқаролик ҳокимиятини яратиш тўғрисидаги битимни имзолаш 3 марта қолдирилди.
Изоҳ (0)