АҚШ “Ҳизбуллоҳ” етакчиси ҳақидаги маълумот учун пул мукофоти эълон қилди

АҚШ Давлат департаменти “Ҳизбуллоҳ” етакчиси Иброҳим Ақил ҳақидаги маълумот учун пул мукофоти эълон қилди. Бу ҳақда Аl Arabia хабар берди.

Иброҳим Ақилнинг ҳибсга олиниши ёки ҳукм қилинишига ёрдам берадиган маълумот учун 7 миллион долларгача мукофот ваъда қилинган. АҚШ Давлат департаменти Таҳсин номи билан ҳам танилган Иброҳим Ақил “Ҳизбуллоҳ”нинг олий ҳарбий органи “Жиҳод кенгаши”да хизмат қилишини билдирди. Мазкур кенгаш 1983 йилги ҳужумлар учун жавобгарликни ўз зиммасига олган.

Мукофот Ҳизбуллоҳ томонидан АҚШнинг Байрутдаги элчихонасини портлатганининг 40 йиллиги муносабати билан эълон қилинмоқда. АҚШ Ақилни 1980 йилларда Ливанда АҚШ ва Германия фуқароларини гаровга олишга қаратилган ҳаракатларга алоқадор деб ҳисоблайди.

1983 йил апрелида АҚШ элчихонасининг портлатилиши оқибатида 63 киши, 1983 йил октябрдаги денгиз пиёдаларининг казармасига ҳужум туфайли 241 киши ҳалок бўлган.

АҚШ Молия вазирлиги 2015 йил июлида Ақилга санкция қўллаган, Давлат департаменти эса 2019 йил сентябрида уни алоҳида ҳимояланган глобал террорчи деб эълон қилган.

“Ҳизбуллоҳ” — Ливандаги ярим ҳарбийлаштирилган шиа ташкилоти ва Ливанда Эрон намунасидаги исломий давлат яратишни ёқловчи сиёсий партиядир. У Эрон ислом инқилоби етакчиси Оятуллоҳ Ҳумайний ғояларига асосланади.