Андижонга қурилиш ишлари учун бюджетдан ажратилган 1,1 млрд сўмлик ишлар сифатсиз бажарилгани аниқланди

Андижон вилоятида қурилиш ишлари бўйича  1,1 млрд сўмлик ишлар сифатсиз бажарилгани аниқланди. Бу ҳақда Бош прокуратура ахборот хизмати хабар берди. 

Хабарга кўра, давлат дастурлари ижро этилишини назорат қилиш ва мувофиқлаштириш бўйича республика штаби раҳбари, Бош прокурор ўринбосари Салом Самадов раҳбарлигидаги ишчи гуруҳ томонидан Андижон вилоятида қурилиш соҳасида амалга оширилаётган ишлар аҳволи ўрганилди. Хусусан, вилоятда дастурлар доирасидаги бюджет маблағлари ҳисобидан 716 та объектда 1 триллион 48 миллиард сўмлик қурилиш таъмирлаш ишлари амалга оширилмоқда.

Ўрганишлар жараёнида, 1,1 миллиард сўмлик сифатсиз ишлар бажарилгани ҳамда 1,5 миллиард сўмлик бажарилмаган ишлар ҳисоботларга қўшиб ёзилгани аниқланиб, камчиликларни жойида бартараф этиш чоралари кўрилди. 

Шунингдек, аниқланган қонун бузилишлар бўйича 13 нафар шахс маъмурий жавобгарликка тортилди ҳамда йўл қўйилган камчиликлар бўйича 35 та ёзма кўрсатмалар берилиши таъминланди. Ўрганишлар якуни бўйича соҳа бўйича барча масъуллар иштирокида йиғилиш ўтказилди.

Қайд этилишича, йиғилишда объектларни фойдаланишга топшириш, маблағларни иқтисод қилиш ва янгидан бошланувчи объектларга шаҳарсозлик ҳужжатларининг ишлаб чиқилишида буюртмачи ташкилотлар ва бошқа мутасаддилар томонидан сусткашликка йўл қўйилаётганлиги алоҳида таъкидланиб, бунга масъул бўлган шахсларнинг тушунтиришлари эшитилди ҳамда камчиликларни бартараф этиш бўйича аниқ муддатлар белгиланди.