Сўнгги бир ҳафтада помидор нархи кескин тушиб кетди

Ўзбекистонда сархил помидорнинг улгуржи нархи сўнгги бир ҳафтада кескин пасайди. Бу ҳақда EastFruit хабар берди.

Маълумотларга кўра, пушти помидорнинг ўртача улгуржи нархи 32 фоизга, қизил думалоқ помидор эса 33 фоизга арзонлашган. 

Экспертларнинг қайд этишича, қизил помидорнинг улгуржи нархлари кетма-кет иккинчи ҳафта пасайгани ҳисобга олинса, сўнгги икки ҳафта ичида ушбу маҳсулот деярли 40 фоизга арзонлашган.

Бозор иштирокчиларининг фикрига кўра, бу ички бозорда сархил помидор бўйича таклиф кескин ўсиши билан боғлиқ. Иссиқхоналардан мазкур турдаги маҳсулотни етказиб бериш ҳажми кўпайган. Шу билан бирга, мамлакатнинг жанубий вилоятларидан плёнка остида туннел усулида етиштирилган помидор ҳосилининг биринчи улгуржи партиялари ҳам бозорга чиқди.

Нархлар мониторингига кўра, 2023 йил 7 апрелдан 14 апрелга қадар қизил помидорнинг ўртача улгуржи нархи 1 кг учун 33 мингдан 22 минг сўмгача пасайган. Шу билан бирга, ушбу маҳсулотнинг ўртача улгуржи нархи ўтган йилнинг шу санасидагидан 16 фоизга юқори.

Пушти помидор нархининг пасайиши фақат шу ҳафтадан бошланди. 7 апрелдан 14 апрелга қадар ушбу маҳсулотнинг ўртача улгуржи нархи 1 кг учун 38 мингдан 26 минг сўмга яъни бир ҳафта ичида 31,5 фоизга пасайган. 

Бироқ қизил помидордан фарқли ўлароқ, жорий улгуржи нархлар ҳали ҳам ўтган йилги даражадан анча юқори. 2023 йил 14 апрель ҳолатига кўра, пушти помидорнинг ўртача улгуржи нархи ўтган йилнинг шу санасидан 1,5 баробар юқоридир.

Ўзбекистон мева-сабзавот маҳсулотларининг йирик экспортёри — GDF Export компанияси тижорат директори Ҳусан Ҳайдаровнинг фикрига кўра, сўнгги бир ҳафтада сархил помидор нархи бундай кескин тушиб кетишига ички бозорда етказиб бериш ҳажми сезиларли даражада ошгани сабаб бўлди. 

Унинг сўзларига кўра, бу иситиладиган иссиқхоналардан таклифлар ҳажми ўсгани ва шу билан бирга, мамлакатнинг жанубий вилоятларидан плёнка остида туннель усулида етиштирилган помидор ҳосилининг биринчи улгуржи партиялари бозорга кириши билан боғлиқ.

Аномал совуқ об-ҳаво чекиниши билан тахминан январь ойининг учинчи ўн кунлиги ўрталаридан бошлаб, иссиқхоналарда газ босими аста-секин тиклана бошлади. Январь ойидаги аномал совуқ туфайли ҳосилни бой берган иссиқхоналарда январь ойи охири—февралнинг бошида яна помидор кўчатлари экилди. Вегетация даврини инобатга олсак, мазкур иссиқхоналарда ҳозир помидор ҳосили йиғим-терими бошланган ва бу маҳсулотнинг илк улгуржи партиялари бозорга чиқа бошлади.

Айни пайтда мамлакатнинг жанубий вилоятларидан плёнка остида туннел усулида етиштирилган помидорнинг илк улгуржи партиялари ҳам бозорга кирмоқда. Масалан, Ўзбекистоннинг энг жанубий ҳудуди саналмиш Сурхондарё вилоятида январь ойи охирига бориб, ҳаво ҳароратининг сезиларли даражада кўтарилгани шу усулда етиштириладиган помидор кўчатларини экишни бошлашга имкон берди.

Натижада сўнгги бир ҳафта—ўн кун ичида ички бозорда сархил помидор етказиб бериш ҳажми сезиларли даражада ошди, бу эса ушбу маҳсулот нархи кескин пасайишига олиб келди.

Бундан ташқари, қулай об-ҳаво шароитида келгуси ҳафталар ҳам сархил помидор бўйича ички бозордаги таклиф ҳажми ўсиб боради ва бу ўз навбатида, ушбу маҳсулот нархи янада пасайишига олиб келади. Шундай қилиб, келгуси ҳафталарда агар об-ҳаво аномалиялари юз бермаса, сўнгги ҳафтадаги нархлар кескин пасайиши ҳолатини сархил помидорнинг улгуржи нархлари динамикасида пасайиш тенденциясини бошланиши, деб ҳисоблаш мумкин, — дейди эксперт.

Аввалроқ Ўзбекистонда помидор нархи рекордларни янгилашда давом этаётгани ҳақида хабар берилганди.