O‘zbekistonda issiqxona pomidorining narxi yangi rekordlarni yangilashda davom etmoqda. Bu haqda EastFruit xabar bermoqda.
Ma’lumotlarga ko‘ra, so‘nggi haftada qizil pomidorning o‘rtacha ulgurji narxi 29 foizga oshdi. Joriy ulgurji narxlar esa o‘tgan yilgi darajadan deyarli 2 baravar yuqori.
Bundan tashqari, so‘nggi bir hafta ichida ushbu mahsulotlar narxining keskin oshishi natijasida O‘zbekistonda qizil pomidorning joriy ulgurji narxlari EastFruit mintaqasida eng yuqori bo‘ldi, — deydi loyiha tahlilchilari.
EastFruit narxlari monitoringiga ko‘ra, 2023-yil 17-martdan 24-martgacha O‘zbekistonda qizil issiqxona pomidorining o‘rtacha ulgurji narxi 28 ming so‘mdan 36 ming so‘m/kgga ya’ni 28,6 foizga oshgan.
Oxirgi uch oyda ushbu mahsulotlar narxining jadal o‘sayotgani hisobga olinsa, joriy yil boshidan 24-martgacha O‘zbekistonda qizil yumaloq pomidorning ulgurji narxlari 2,4 barobarga oshdi.
2023-yil 24-mart holatiga ko‘ra, O‘zbekistonda qizil issiqxona pomidorining o‘rtacha ulgurji narxi o‘tgan yilning shu sanasiga nisbatan 1,8 baravar va 2020—2021-yillarning shu sanasiga nisbatan 2,4 baravar yuqori bo‘ldi.
O‘tgan haftada qizil pomidor narxlarining keskin oshishi natijasida O‘zbekistonda ushbu mahsulotlarning ulgurji narxlari EastFruit meva-sabzavotlarni haftalik monitoring qiladigan mamlakatlar orasida eng yuqori bo‘lib chiqdi.
2023-yil 24-mart holatiga ko‘ra, mintaqa mamlakatlarida qizil issiqxona pomidorining o‘rtacha ulgurji narxi (1 kg uchun):
- O‘zbekiston — 3,16 dollar;
- Polsha — 2,79 dollar;
- Ukraina — 2,60 dollar;
- Tojikiston — 2,29 dollar;
- Moldova — 1,61 dollar;
- Gruziya — 1,16 dollar.
O‘tgan haftada pushti pomidorlar narxi ham ko‘tarildi, ammo o‘sish sur’ati qizil pomidorga qaraganda ancha past.
2023-yilning 17-martidan 24-martigacha O‘zbekistonda pushti pomidorning o‘rtacha ulgurji narxi 33 ming so‘mdan 36 ming so‘m/kgga ya’ni 9,1 foizga oshdi.
Oxirgi bir yarim oy davomida ushbu mahsulotlar narxlarining barqaror oshib borishini hisobga olinsa, 2023-yil 10-fevraldan 24-martgacha O‘zbekistonda pushti issiqxona pomidorining o‘rtacha ulgurji narxi 1,8 barobarga oshdi.
2023-yil 24-mart holatiga ko‘ra, ushbu mahsulotlarning o‘rtacha ulgurji narxi o‘tgan yilning shu sanasidan 1,8 barobar, 2021-yilning shu sanasidan esa 2,1 baravar yuqori bo‘lgan.
Izoh (0)