So‘nggi bir haftada pomidor narxi keskin tushib ketdi

O‘zbekistonda sarxil pomidorning ulgurji narxi so‘nggi bir haftada keskin pasaydi. Bu haqda EastFruit xabar berdi.

Ma’lumotlarga ko‘ra, pushti pomidorning o‘rtacha ulgurji narxi 32 foizga, qizil dumaloq pomidor esa 33 foizga arzonlashgan. 

Ekspertlarning qayd etishicha, qizil pomidorning ulgurji narxlari ketma-ket ikkinchi hafta pasaygani hisobga olinsa, so‘nggi ikki hafta ichida ushbu mahsulot deyarli 40 foizga arzonlashgan.

Bozor ishtirokchilarining fikriga ko‘ra, bu ichki bozorda sarxil pomidor bo‘yicha taklif keskin o‘sishi bilan bog‘liq. Issiqxonalardan mazkur turdagi mahsulotni yetkazib berish hajmi ko‘paygan. Shu bilan birga, mamlakatning janubiy viloyatlaridan plyonka ostida tunnel usulida yetishtirilgan pomidor hosilining birinchi ulgurji partiyalari ham bozorga chiqdi.

Narxlar monitoringiga ko‘ra, 2023-yil 7-apreldan 14-aprelga qadar qizil pomidorning o‘rtacha ulgurji narxi 1 kg uchun 33 mingdan 22 ming so‘mgacha pasaygan. Shu bilan birga, ushbu mahsulotning o‘rtacha ulgurji narxi o‘tgan yilning shu sanasidagidan 16 foizga yuqori.

Pushti pomidor narxining pasayishi faqat shu haftadan boshlandi. 7-apreldan 14-aprelga qadar ushbu mahsulotning o‘rtacha ulgurji narxi 1 kg uchun 38 mingdan 26 ming so‘mga ya’ni bir hafta ichida 31,5 foizga pasaygan. 

Biroq qizil pomidordan farqli o‘laroq, joriy ulgurji narxlar hali ham o‘tgan yilgi darajadan ancha yuqori. 2023-yil 14-aprel holatiga ko‘ra, pushti pomidorning o‘rtacha ulgurji narxi o‘tgan yilning shu sanasidan 1,5 barobar yuqoridir.

O‘zbekiston meva-sabzavot mahsulotlarining yirik eksportyori —GDF Eksport kompaniyasi tijorat direktori Husan Haydarovning fikriga ko‘ra, so‘nggi bir haftada sarxil pomidor narxi bunday keskin tushib ketishiga ichki bozorda yetkazib berish hajmi sezilarli darajada oshgani sabab bo‘ldi. 

Uning so‘zlariga ko‘ra, bu isitiladigan issiqxonalardan takliflar hajmi o‘sgani va shu bilan birga, mamlakatning janubiy viloyatlaridan plyonka ostida tunnel usulida yetishtirilgan pomidor hosilining birinchi ulgurji partiyalari bozorga kirishi bilan bog‘liq.

Anomal sovuq ob-havo chekinishi bilan taxminan yanvar oyining uchinchi o‘n kunligi o‘rtalaridan boshlab, issiqxonalarda gaz bosimi asta-sekin tiklana boshladi. Yanvar oyidagi anomal sovuq tufayli hosilni boy bergan issiqxonalarda yanvar oyi oxiri—fevralning boshida yana pomidor ko‘chatlari ekildi. Vegetatsiya davrini inobatga olsak, mazkur issiqxonalarda hozir pomidor hosili yig‘im-terimi boshlangan va bu mahsulotning ilk ulgurji partiyalari bozorga chiqa boshladi.

Ayni paytda mamlakatning janubiy viloyatlaridan plyonka ostida tunnel usulida yetishtirilgan pomidorning ilk ulgurji partiyalari ham bozorga kirmoqda. Masalan, O‘zbekistonning eng janubiy hududi sanalmish Surxondaryo viloyatida yanvar oyi oxiriga borib, havo haroratining sezilarli darajada ko‘tarilgani shu usulda yetishtiriladigan pomidor ko‘chatlarini ekishni boshlashga imkon berdi.

Natijada so‘nggi bir hafta—o‘n kun ichida ichki bozorda sarxil pomidor yetkazib berish hajmi sezilarli darajada oshdi, bu esa ushbu mahsulot narxi keskin pasayishiga olib keldi.

Bundan tashqari, qulay ob-havo sharoitida kelgusi haftalar ham sarxil pomidor bo‘yicha ichki bozordagi taklif hajmi o‘sib boradi va bu o‘z navbatida, ushbu mahsulot narxi yanada pasayishiga olib keladi. Shunday qilib, kelgusi haftalarda agar ob-havo anomaliyalari yuz bermasa, so‘nggi haftadagi narxlar keskin pasayishi holatini sarxil pomidorning ulgurji narxlari dinamikasida pasayish tendensiyasini boshlanishi, deb hisoblash mumkin, — deydi ekspert.

Avvalroq O‘zbekistonda pomidor narxi rekordlarni yangilashda davom etayotgani haqida xabar berilgandi.