Судан пойтахтида армия ва уларга қарши кучлар ўртасида тўқнашув юз берди (видео)

Судан пойтахти Хартумнинг бир қанча туманларида ва шаҳар чеккасида отишма овозлари эшитилмоқда, деб хабар берди Reuters гувоҳларга таяниб.

Маҳаллий аҳолининг сўзларига кўра, кўчада артиллерия қурилмалари ва зирҳли техникалар жойлаштирилган. Улардан бири агентликка Судан армияси ва уларга қарши тузилма — “Тезкор ҳаракат кучлари” (RSF) штаб-квартираси яқинида оғир артиллерия ўқларининг овозини эшитганини айтди.

“Ал-Жазира” шаҳарнинг турли жойларида тутун кўтарилаётгани, кўчаларга аскарлар жойлаштирилгани ҳақида ёзди.

RSF томонининг маълум қилишича, армия ҳарбий хизматчилари уларнинг Хартумдаги базаларидан бирини қуршаб олиб, турли хил қуроллардан ўққа тутган. RSF кучлари мамлакат шимолидаги Мурави базаси, шунингдек, Хартум халқаро аэропорти устидан назорат ўрнатганини даъво қилмоқда. ОАВ хабарларига кўра, аэропорт ишлашдан тўхтаган.

Ўз навбатида, Судан армияси вакили RSF кучларини Хартум ва бошқа ҳудудларда жойлашган армия лагерларига ҳужум қилишда айблади.

2019 йилда “Тезкор ҳаракат кучлари” (RSF) ва Судан армияси биргаликда мамлакатдаги ҳарбий тўнтаришда иштирок этганди. Ўшанда мамлакатни 30 йилдан буён бошқариб келаётган президент Умар ал-Башир ҳокимиятдан четлаштирилган. Икки йил ўтиб, 2021 йил октябрь ойида Суданда RSF тузилмаси ва мунтазам армия иштирокида навбатдаги давлат тўнтариши бўлиб ўтди.

2021 йилги давлат тўнтаришидан буён Суданни Ўтиш даври ҳарбий-фуқаролик маъмурияти — ўтиш даври суверен кенгаши бошқармоқда. Мамлакат армияси ва демократия тарафдори бўлган гуруҳлар RSF’нинг Қуролли кучларга қўшилишини талаб қилмоқда. Ушбу масала бўйича музокаралар кескинлик чиқаришда давом этмоқда, шу сабабли апрель ойи бошида Судан суверен кенгаши ва мухолифатчилар ўртасида мамлакатда ўтиш даври фуқаролик ҳокимиятини яратиш тўғрисидаги битимни имзолаш 3 марта қолдирилди.