Франция президенти Эммануэл Макрон мамлакатда кенг кўламли норозиликларга сабаб бўлган пенсия ислоҳоти тўғрисидаги қонунни маъқуллади. Унда пенсия ёшини 62 дан 64 га ошириш назарда тутилган. Қонун Франциянинг расмий журналида чоп этилди.
“Ижтимоий суғурта кодексига ўзгартиришлар киритилмоқда. Биринчи хатбошидаги “олтмиш икки” сўзлари “олтмиш тўрт” деган сўзлар билан алмаштирилди”, — дейилади ҳужжатда.
14 апрель куни ислоҳотнинг асосий қоидалари мамлакат Конституциявий кенгаши томонидан маъқулланган. Елисей саройи баёнотига кўра, президент ҳужжат Конституциявий кенгаш томонидан тасдиқланганидан кейин 48 соат ичида қонунни имзолаши керак эди. Пенсия ёшини ошириш ҳақидаги қонунга қарши чиққанлар Макрондан ҳужжатни имзоламасликни талаб қилишди. Аммо, расмий баёнотда айтилишича, Франция раҳбари уни имзолаган.
Қонун қабул қилингандан кейин мухолифатчилар ислоҳотни бекор қилишга уринишда давом этишини билдирди. BFM телеканалига кўра, 15 апрель куни Франциянинг бир қанча шаҳарларида ўнлаб норозилик намойишлари ўтказилиши режалаштирилган.
14 апрель куни ҳам шаҳарларда пенсия ёшини оширишга қарши митинглар бўлиб ўтди. Хусусан, акцияда камида тўрт минг киши иштирок этган Парижда бошланган тартибсизликлар оқибатида 112 киши ҳибсга олинган.
Март ойида Франция бош вазири Элизабет Борн пенсия ёшини 62 ёшдан 64 ёшга ошириш ҳақидаги қонун парламентда овоз беришларсиз қабул қилинишини маълум қилганди. Франция парламенти қуйи палатаси аъзолари ҳукуматга ишончсизлик вотумини қўйиш ва ислоҳотни тўхтатишга икки марта уринди, бироқ иккала ҳолатда ҳам овоз бериш муваффақиятсиз тугади.
Изоҳ (0)