Статистика агентлиги маълумотларига кўра, 2023 йилнинг 1 январь ҳолатига Ўзбекистонда кўп қаватли уйлардаги хонадонлар сони 1 миллион 464,5 мингтани ташкил этмоқда.
Қайд этилишича, ушбу кўрсаткич 2022 йилнинг мос даврига нисбатан 62,1 мингтага ошган.
Ҳудудлар бўйича кўп қаватли уйлар энг кўп Тошкент шаҳрида жойлашган — 527,9 мингта. Ундан кейинги ўринларни 164 минг ва 125,3 минг кўрсаткич билан Тошкент ҳамда Фарғона вилояти эгаллаб турибди. Кўп қаватли уйлар ҳудудлар кесимида:
- Қорақалпоғистон Республикаси — 44,1 мингта;
- Андижон вилояти — 56,8 мингта;
- Бухоро вилояти — 68,4 мингта;
- Жиззах вилояти — 67,2 мингта;
- Қашқадарё вилояти — 59,1 мингта;
- Навоий вилояти — 77,7 мингта;
- Наманган вилояти — 49,6 мингта;
- Самарқанд вилояти — 97,7 мингта;
- Сурхондарё вилояти — 45 мингта;
- Сирдарё вилояти — 43,2 мингта;
- Тошкент вилояти — 164,0 мингта;
- Фарғона вилояти — 125,3 мингта;
- Хоразм вилояти — 38,5 мингта.
“Янги Ўзбекистон” ва бошқа давлат дастурлари доирасида қурилган массивларнинг бўш ерларида кўп қаватли уй-жойлар қуришни давом эттириш ва 2023 йилда қуриш ҳажмини 90 мингтага етказиш таклиф этилмоқда. 1 майдан бошлаб расмий даромади етарли бўлмаган аҳолига ҳам ипотека кредити олиш имкони яратилиши ҳақида хабар берилган эди. Президентнинг 13 апрелдаги мазкур қарори билан эндиликда банкларга ипотека кредитларини расмий даромадга эга бўлмаган жисмоний шахсларга ҳам ажратишга рухсат этилди. Бунда, ушбу фуқароларнинг тўлов қобилияти уларнинг банк картасидаги айланмаси, ижара, коммунал ва бошқа харажатларини ҳисобга олган ҳолда аниқланади.
Изоҳ (0)