Жиноят ишлари бўйича Яккасарой туман судида ўзганинг iPhone телефонини тортиб олган 30 ёшли шахсга нисбатан суд иши кўриб чиқилди. Бу ҳақда “Замон” информацион дастурида маълум қилинди.

Қайд этилишича, судланувчи 17 февраль куни Яккасарой туманида жойлашган спа-салонига массаж олиш учун борган. У ердан 6-7 нафар қиз орасидан жабрланувчини танлаб, 3-4 миллион сўм тўлов қилган, ишқий муносабатлар якунда келишмовчиликка айланган.

Икки нафар фарзанди борлигини маълум қилган жабрланувчи аёлнинг айтишича, судланувчи маст ҳолатда бўлган ва массаждан кейин унинг iPhone 11 Pro телефонини олиб кетган. Эркак телефон орқасида бўлган пулларни ишлатиб, телефоннинг ўзини қайтариб олиб келиб берган.

Сайёр суд мажлисида судланувчи айбига тўлиқ иқрорлигини билдириб, жабрланувчига етказилган моддий зарарни қоплаб берганини айтган.

Суд ҳукми билан судланувчи Жиноят кодексининг 166-моддаси (талончилик) 1-қисми билан айбли деб топилди. Ва у шу моддага кўра, иш ҳақининг 20 фоизини давлат даромадига ўтказган ҳолда 2 йил ахлоқ жазосига жалб этилди.