Fransiya prezidenti Emmanuel Makron mamlakatda keng ko‘lamli noroziliklarga sabab bo‘lgan pensiya islohoti to‘g‘risidagi qonunni ma’qulladi. Unda pensiya yoshini 62 dan 64 ga oshirish nazarda tutilgan. Qonun Fransiyaning rasmiy jurnalida chop etildi.
“Ijtimoiy sug‘urta kodeksiga o‘zgartirishlar kiritilmoqda. Birinchi xatboshidagi “oltmish ikki” so‘zlari “oltmish to‘rt” degan so‘zlar bilan almashtirildi”, — deyiladi hujjatda.
14-aprel kuni islohotning asosiy qoidalari mamlakat Konstitutsiyaviy kengashi tomonidan ma’qullangan. Yelisey saroyi bayonotiga ko‘ra, prezident hujjat Konstitutsiyaviy kengash tomonidan tasdiqlanganidan keyin 48 soat ichida qonunni imzolashi kerak edi. Pensiya yoshini oshirish haqidagi qonunga qarshi chiqqanlar Makrondan hujjatni imzolamaslikni talab qilishdi. Ammo, rasmiy bayonotda aytilishicha, Fransiya rahbari uni imzolagan.
Qonun qabul qilingandan keyin muxolifatchilar islohotni bekor qilishga urinishda davom etishini bildirdi. BFM telekanaliga ko‘ra, 15-aprel kuni Fransiyaning bir qancha shaharlarida o‘nlab norozilik namoyishlari o‘tkazilishi rejalashtirilgan.
14-aprel kuni ham shaharlarda pensiya yoshini oshirishga qarshi mitinglar bo‘lib o‘tdi. Xususan, aksiyada kamida to‘rt ming kishi ishtirok etgan Parijda boshlangan tartibsizliklar oqibatida 112 kishi hibsga olingan.
Mart oyida Fransiya bosh vaziri Elizabet Born pensiya yoshini 62 yoshdan 64 yoshga oshirish haqidagi qonun parlamentda ovoz berishlarsiz qabul qilinishini ma’lum qilgandi. Fransiya parlamenti quyi palatasi a’zolari hukumatga ishonchsizlik votumini qo‘yish va islohotni to‘xtatishga ikki marta urindi, biroq ikkala holatda ham ovoz berish muvaffaqiyatsiz tugadi.
Izoh (0)