Дунёдаги энг бадавлат одамнинг бойлиги бир кунда 12 миллиард долларга ошди

Дунёнинг энг бадавлат одами, LVMH гуруҳи эгаси Бернард Арнонинг бойлиги 13 апрель куни 12 миллиард долларга ошган ва ҳозирда 237,8 миллиард долларни ташкил қилмоқда. Бу ҳақда Bloomberg хабар берди.

Агентлик маълумотларига кўра, бу Арно учун рекорд сумма, шунингдек, бойликнинг бир кунлик ўсиши бўйича иккинчи энг йирик кўрсаткичдир. 

Ҳозирда энг бой одамлар рейтингининг иккинчи ўрнида 180 миллиард доллар бойлиги билан бизнесмен Илон Маск турибди.13 апрель куни у ҳам 3,8 миллиард доллар ишлаб топган.

Bloomberg таъкидлашича, Арно Маск устидан ўз етакчилигини мустаҳкамламоқда ва аллақачон “тадбиркорни чанг остида қолдирган”.

LVMH (Louis Vuitton Моët Hennessy) — мода, пойабзал , соатлар, заргарлик буюмлари, парфюмерия, косметика, спиртли ичимликлар, сумкалар ва бошқалар каби юқори сифатли маҳсулотларни ишлаб чиқариш ва сотишга ихтисослашган кўп тармоқли француз корпорацияси.

Корпорация нафақат Louis Vuitton, Моёt ва Hennessy, балки Christian Dior, Fendi, Givenchy, Kenzo, Mark Jacobs, Bulgari, Hublot ва бошқаларни ўз ичига олган кўплаб машҳур брендларга эга. Арно оиласи LVMH устав капиталининг 48 фоизига эгалик қилади.

Аввалроқ Бернард Арно қандай қилиб дунёдаги энг бадавлат одамга айлангани ҳақида маълумот берилган эди.