Россия президенти Владимир Путин Американинг The Wall Street Journal газетаси мухбири Эван Гершковичнинг ҳибсга олинишини шахсан маъқуллаган, деб ёзади Bloomberg вазиятдан хабардор манбаларга таяниб.
Агентлик суҳбатдошларига кўра, Гершковични ҳибсга олиш ташаббуси Россия махсус хизматларининг юқори мартабали амалдорларидан чиққан. Ҳибсга олиш бўйича якуний қарорни президент қабул қилганига журналистларнинг ишончи комил, чунки махсус хизматлар бевосита унга бўйсунади.
Нашр манбаларининг фикрича, бу қарор Кремлда АҚШ билан қарама-қаршиликни чуқурлаштиришни талаб қилаётган одамларнинг таъсири кучайиб бораётганидан далолат беради.
Ўз навбатида, Вашингтондаги Европа сиёсатини таҳлил қилиш маркази раҳбари Алина Полякова агентликка бўлиб ўтган воқеа нафақат АҚШ, балки бутун Ғарб учун “огоҳлантирувчи сигнал” бўлиши кераклигини айтди: “Бу шундан далолат берадики, Путин барқарор ва ишончли муносабатларга қайтилмайди, деган фикрда”, — деди Полякова.
Bloomberg агентлиги таъкидлашича, Россия расмийлари Эван Гершковични бизнесмен Владислав Клюшинга алмаштиришга уриниши мумкин. Клюшин АҚШда бир компаниянинг компьютер тармоқларига бузиб кириш ва ўн миллионлаб долларлик савдолар ҳақида маълумот тўплашда айбланган. Агентлик ёзганидек, Россия аввалроқ Клюшинни маҳбуслар алмашинувига қўшишни талаб қилган.
Журналист Эван Гершкович март ойи охирида Екатеринбургда жосуслик иши бўйича ҳибсга олинган эди. Ўшанда Россия ФХХ у гўёки Россия ҳарбий-саноат комплекси корхоналаридан бири ҳақида махфий маълумотларни тўплаганини даъво қилди. Meduza хабарига кўра, Гершкович ҳибсга олинишидан аввал “Уралвагонзавод” мудофаа заводи жойлашган Нижний Тагил шаҳрига борган. Гершкович билан бир вақтда яна икки киши —“Уралвагонзавод”да ишлаган нижний тагиллик эр-хотин ҳибсга олинган
Апрель ойида АҚШ Давлат департаменти Гершковични “ноҳақ ҳибсга олинган” деб эълон қилди, бу уни алмашиш бўйича музокараларга йўл очади.
Изоҳ (0)