Rossiya prezidenti Vladimir Putin Amerikaning The Wall Street Journal gazetasi muxbiri Evan Gershkovichning hibsga olinishini shaxsan ma’qullagan, deb yozadi Bloomberg vaziyatdan xabardor manbalarga tayanib.
Agentlik suhbatdoshlariga ko‘ra, Gershkovichni hibsga olish tashabbusi Rossiya maxsus xizmatlarining yuqori martabali amaldorlaridan chiqqan. Hibsga olish bo‘yicha yakuniy qarorni prezident qabul qilganiga jurnalistlarning ishonchi komil, chunki maxsus xizmatlar bevosita unga bo‘ysunadi.
Nashr manbalarining fikricha, bu qaror Kremlda AQSH bilan qarama-qarshilikni chuqurlashtirishni talab qilayotgan odamlarning ta’siri kuchayib borayotganidan dalolat beradi.
O‘z navbatida, Vashingtondagi Yevropa siyosatini tahlil qilish markazi rahbari Alina Polyakova agentlikka bo‘lib o‘tgan voqea nafaqat AQSH, balki butun G‘arb uchun “ogohlantiruvchi signal” bo‘lishi kerakligini aytdi: “Bu shundan dalolat beradiki, Putin barqaror va ishonchli munosabatlarga qaytilmaydi, degan fikrda”, — dedi Polyakova.
Bloomberg agentligi ta’kidlashicha, Rossiya rasmiylari Evan Gershkovichni biznesmen Vladislav Klyushinga almashtirishga urinishi mumkin. Klyushin AQSHda bir kompaniyaning kompyuter tarmoqlariga buzib kirish va o‘n millionlab dollarlik savdolar haqida ma’lumot to‘plashda ayblangan. Agentlik yozganidek, Rossiya avvalroq Klyushinni mahbuslar almashinuviga qo‘shishni talab qilgan.
Jurnalist Evan Gershkovich mart oyi oxirida Yekaterinburgda josuslik ishi bo‘yicha hibsga olingan edi. O‘shanda Rossiya FXX u go‘yoki Rossiya harbiy-sanoat kompleksi korxonalaridan biri haqida maxfiy ma’lumotlarni to‘plaganini da’vo qildi. Meduza xabariga ko‘ra, Gershkovich hibsga olinishidan avval “Uralvagonzavod” mudofaa zavodi joylashgan Nijniy Tagil shahriga borgan. Gershkovich bilan bir vaqtda yana ikki kishi —“Uralvagonzavod”da ishlagan nijniy tagillik er-xotin hibsga olingan
Aprel oyida AQSH Davlat departamenti Gershkovichni “nohaq hibsga olingan” deb e’lon qildi, bu uni almashish bo‘yicha muzokaralarga yo‘l ochadi.
Izoh (0)