Камбағалликни қисқартириш ва бандлик вазирлиги “Олий таълим муассасалари талабаларини мутахассислиги бўйича ишлашига имконият яратиш чора-тадбирлари тўғрисида”ги Вазирлар Маҳкамаси қарори лойиҳасини муҳокамага қўйди.
Унга кўра мазкур қарор қабул қилинса:
- олий таълим муассасалари талабаларини иккинчи курсдан (айрим таълим йўналишларида иккинчи курсдан кейинги курслардан) бошлаб олий таълим муассасаси раҳбари томонидан берилган сертификат асосида мутахассислиги бўйича ўқишдан бўш вақтида ишлашига рухсат этилади;
- ҳақ тўланадиган ишлаб чиқариш амалиёти ва ҳақ тўланадиган стажировка ўтаётган талабаларни ишга қабул қилишда сертификат талаб қилинмайди;
- талабаларни сертификат асосида мутахассислиги бўйича ишлашига фақат олий таълим муассасасида ўқиётган даврида рухсат этилади.
Шунингдек, Олий таълим, фан ва инновациялар вазирлигига икки ой муддатда қуйидагиларни назарда тутувчи талабаларга мутахассислиги бўйича ишлаш ҳуқуқини берувчи сертификат бериш тартибини ишлаб чиқиш ва тасдиқлаш вазифалари юкланади:
- сертификат бериладиган таълим йўналишлари рўйхати;
- сертификатни таълим йўналишлари бўйича қайси курсдан бошлаб берилиши;
- сертификатни беришда инобатга олинадиган ҳолатлар.
Камбағалликни қисқартириш ва бандлик вазирлиги олий таълим муассасалари талабаларини ўқиш даврида мутахассислиги бўйича ишлашини инобатга олиб, 2024 йилга қадар Хизматчиларнинг асосий лавозимлари ва ишчилар касбларининг классификатори ҳамда малака даражаларига эришиш схемасига ўзгартириш ва қўшимчалар киритиш чораларини кўриши таклиф этилмоқда.
2022 йил март ойидаги видеоселектор йиғилишида Шавкат Мирзиёев талабалар бандлигини таъминлаш масалалари юзасидан бир қатор топшириқлар берганди. Ўшанда олийгоҳлар атрофидаги мактаб ва боғчаларда 13 минг вакант иш ўринлари мавжудлиги айтилганди. Камида 10 минг нафар талабани улар учун жойлашуви қулай бўлган мактаб ва боғчаларга ишга жойлаштириш мумкинлиги кўрсатиб ўтилган.
Президент мазкур видеоселектор йиғилишида ўзининг ёшлик йилларини ёдга олган эди. “Мен ўзим талаба бўлганимда иккита жойда ишлар эдим. Бизда “военная кафедра” бор эди ва насосларни “регулировка” қилиш бўйича. Ҳозиргача эсимдан чиқмайди, иккита жойда яхши ойлик олар эдим. 56 сўм битта кафедрадан, 42 сўм битта кафедрадан”, — деганди президент.
Изоҳ (0)