Европа Иттифоқининг инсон ҳуқуқлари бўйича махсус вакили Эндрю Гилмор Ўзбекистонга ташриф буюради. Бу ҳақда Инсон ҳуқуқлари “Эзгулик” жамияти раиси Абдураҳмон Ташанов ўзининг Facebook’даги саҳифаси орқали маълум қилди.
Унинг ёзишича, 17 апрель куни Ўзбекистонга Европа Иттифоқининг Инсон ҳуқуқлари бўйича махсус вакили Эндрю Гилмор бошчилигидаги делегация келади.
Делегация вакиллари Ўзбекистон расмийлари, давлат ва жамоат ташкилотлари мулозимлари ҳамда фуқаролик жамияти вакиллари билан учрашади.
“Билишимизча, делегация мамлакатда инсон ҳуқуқлари вазияти, демократик жараёнлар ва референдум масаласи билан қизиқади”, — деб ёзади Ташанов.
Эндрю Гилмор Оксфорд университетида тарих, шунингдек, Лондон иқтисодиёт мактабида тарих ва бошқарув йўналишларида магистрлик даражаларини олган. У ҳозирги лавозимига қадар БМТ Бош котибининг инсон ҳуқуқлари бўйича ёрдамчиси бўлган. 2019 йилда Европа Иттифоқидаги лавозимига тайинланган.
Аввалроқ Фулвио Мартушелло бошчилигидаги Европарламентнинг беш депутатидан иборат Марказий Осиё билан алоқалар бўйича делегация Ўзбекистонга ташриф буюриши маълум қилинганди. Ушбу ташриф Россиянинг Украинага қарши уруши, Ўзбекистонда бўлажак Конституциявий референдум ҳамда Кенгайтирилган шериклик ҳамда ҳамкорлик тўғрисидаги Битимнинг имзоланиши муносабати билан икки томонлама муносабатлар учун муҳим паллада бўлиб ўтаётгани айтилган.
Изоҳ (0)