“Ўзгидромет” хабарига кўра, 15–17 апрель кунлари Ўзбекистонга совуқ ва нам ҳаво массалари кириб келиши кутилмоқда. Баъзи жойларда ҳарорат нол даражагача пасайиши мумкин. ЎзАнинг ёзишича, ҳозирги мавсум учун тунда ҳаво ҳароратининг нол даражага пасайиши, тупроқ сиртида ҳам ҳароратни сезиларли даражада пасайтиришига олиб келади. Бу қишлоқ хўжалиги учун “совуқ уриш” (заморозок) ҳодисасини келтириб чиқариши мумкин. Хўш, бундай ҳароратда мева ва сабзавотларни совуқ уришидан сақлаб қолса бўладими?
Наманган вилояти фемер, деҳқон хўжаликлари ва томорқа ер эгалари кенгаши раиси Носиржон Каюмов “Дарё” мухбири билан суҳбатда ҳаво ҳарорати пасайган пайтда ҳосилни асраб қолишнинг бир неча турлари борлигини айтди.
“Ҳаво ҳарорати совиб кетадиган бўлса, мевали боғларда тутун ҳосил қилиш керак. Шунда ҳароратни максимал илиқ ушлаш мумкин. Бундай вазиятда тутундан бошқа чора йўқ. Масалан, 1 гектарли боғнинг 10-15 та жойида ҳашак ёқиб, тутатиш фойда беради. Бизда шунинг натижаси яхши бўлган. Ҳозиги шароитда дарахтлар анча мева тугиб қолган. Шунинг ҳисобига ҳосилни ушлаб қолиш имкони юқори. Дарахтлар танасига сув юргани учун музлаб қолмаслик эҳтимоли катта бўлади. Деҳқонлар ушбу методларни қўллашга тайёр туриши керак”, — деди мутахассис.
Носиржон Каюмовнинг таъкидлашича, ғалла ва сабзавотларни суғориш орқали совуқ уришидан сақлаб қолиш мумкин.
“Шундай қилинса, уларга совуқ кўп ҳам зарар келтирмайди. Чунки сув ер тафтини ушлайди. Картошка туганак бўлади. Ер остидалиги учун танаси ва поясига совуқ таъсир қилиши мумкинку, лекин у яна янгиланиб олади. Пиёз ҳам ҳудди шундай. Лекин қулупнайлар таъсирчан бўлади. Уларга кўп сув қуйиб бўлмайди, фақат тутатиш керак”, — дея тажрибаси билан ўртоқлашди деҳқон.
Аввалроқ Ўзбекистонда 15–17 апрель кунлари совуқ ва нам ҳаво массалари кириб келиши кутилаётгани хабар қилинганди.
Изоҳ (0)