Латвия Мудофаа вазирлиги латвиялик ҳарбий хизматчилар Украинага юборилганини тасдиқлади, уларга элчихонани қўриқлаш каби “ёрдамчи вазифаларни” бажариш топширилган, деб хабар бермоқда Delfi вазирликка таяниб.
Вазирлик Латвия ҳарбийлари жанговар ҳаракатларда қатнашмаслигини таъкидлади. Мудофаа вазирлиги Украинада қанча аскар борлигига аниқлик киритмади ва уларнинг вазифалари тафсилотларини ошкор этмади.
Пентагоннинг интернетга сиздирилган махфий ҳужжатларидан бирида Украинада Буюк Британиянинг (50 киши), Латвия (17 киши), Франция (15 киши), АҚШ (14 киши) ва Нидерландиянинг (1) ҳарбий хизматчилари борлиги айтилган. Улар Украинада айнан нима қилаётгани ҳужжатда ошкор этилмаган.
Ўз навбатида, АҚШ Миллий хавфсизлик кенгаши вакили Жон Кирби ҳам Fox Newsъга берган интервьюсида Украинадаги Америка элчихонасида кам сонли АҚШ ҳарбийларининг мавжудлигини тасдиқлаган.
Пентагоннинг махфий ҳужжатлари интернетда тарқалиб кетгани ҳақида апрель ойи бошида маълум бўлди. Уларда хусусан, АҚШ ва НАТОнинг Украина Қуролли кучларини қарши ҳужумга тайёрлаш режалари тасвирланган.
Мутахассисларнинг таъкидлашича, тармоққа тарқалган ҳужжатлар қисман таҳрирланган, хусусан, урушда ҳалок бўлган украиналиклар сони ҳаддан ташқари ошириб кўрсатилган, Россия армиясининг йўқотишлари эса кам баҳоланган. Ҳужжатлар атай чалғитиш учун тарқатилган бўлиши ҳам мумкин.
8 апрель куни The New York Times интернетда тарқалган махфий ҳужжатларнинг янги тўплами ҳақида хабар берди. 10 апрель куни АҚШ Адлия вазирлиги воқеа юзасидан тергов бошлади.
Изоҳ (0)