Украина бош вазири Денис Шмигаль 12 апрель куни АҚШ Мудофаа вазири Ллойд Остин билан учрашувда узоқ масофали ракеталар, F-15 ва F-16 қирувчи-бомбардимончи самолётлари, шунингдек, қўшимча зирҳли машиналар ва бошқа қуролларни Киевга беришни сўради.
“Украина ҳануз фаол ҳарбий ёрдамга, ҳаво ҳужумидан мудофаа тизимларига, шунингдек, оғир артиллерия, миномёт ва ўқ-дориларга муҳтож. Шунингдек, Украинани узоқ масофага учувчи ракеталар билан таъминлаш имкониятини қайта кўриб чиқишингизни сўраймиз”, — деди Шмигаль Пентагондаги учрашувда.
Бундан ташқари Украина бош вазири яна бир бор АҚШни Киевга қирувчилар етказиб бериш бўйича коалицияга қўшилишга чақирди. “Америка Украинани F-15 ва F-16 самолётлари билан таъминлаш орқали яна ўзининг етакчилик ролини намойиш қилиши мумкин”, — деди у.
“Ўзимизни ва Европани ҳимоя қилиш учун бизга кўпроқ оғир техника, шунингдек, самолётлар керак. Биз АҚШнинг танк коалициясига қўшилишини, Украинага Abrams танклари, шунингдек, Bradley ҳамда Stryker пиёдалар учун жанговар машиналарини етказиб бериш ҳақидаги қарорини олқишлаймиз. Қарши ҳужумнинг муваффақияти учун бундай таъминотни кўпайтириш керак”, — деди Шмигаль.
АҚШ ҳарбий ёрдами устидан назорат қилишга келишилди
Ўз навбатида, Ллойд Остин Қўшма Штатлар аллақачон Украинага катта миқдорда ҳарбий ёрдам кўрсатганини эслатди. “Биз хавфсизлик учун ўнлаб миллиард долларлик ёрдам кўрсатдик. Иттифоқчиларимиз ва ҳамкорларимиз билан биргаликда HIMARS ва гаубицалар, NASAMS ва IRIS-Т, Stryker машиналари, Леопард танклари ва бошқа кўплаб тизимларни етказиб бердик. Жанг майдонида булар натижасини берди”, — дея Остиннинг сўзларини келтиради “Америка Овози”.
Пентагон матбуот хизмати баёнотида айтилишича, Остин ва Шмигаль “Россия агрессиясининг давом этиши фонида АҚШнинг Украинани қўллаб-қувватлаши, жумладан, “ҳаво мудофааси ва артиллерия каби хавфсизлик ёрдами ҳамда украиналик аскарларни тайёрлаш каби устувор йўналишлар”ни муҳокама қилган.
Ҳужжатда қайд этилишича, томонлар АҚШнинг Киевга ҳарбий ёрдами қандай сарфланиши устидан назорат ўрнатиш муҳимлиги ҳақида келишиб олган. Остин, шунингдек, Шмигальни 21 апрелда бўлиб ўтадиган Киевга ҳарбий ёрдам бўйича Ғарбий алоқа гуруҳининг навбатдаги йиғилишининг асосий масалаларидан хабардор қилган ва АҚШ Украинани қанча керак бўлса, шунча вақт қўллаб-қувватлашига ишонтирган.
Изоҳ (0)