Россия таркибидаги Татаристон республикаси Олий суди Қозон шаҳридаги гимназияда оммавий қотиллик содир этган 21 ёшли Илназ Галявиевни умрбод қамоқ жазосига ҳукм қилди, деб ёзмоқда Meduza.
2021 йил 11 май куни Қозон шаҳридаги 175-сонли гимназияга қуролли ҳужум уюштирилган эди. Ҳужум оқибатида етти нафар бола ва икки нафар ўқитувчи ҳалок бўлган, 23 киши, асосан, болалар яраланган. Ўша пайтда 19 ёшда бўлган ҳужумчи Галявиев шу гимназиянинг битирувчиси бўлган. У воқеа жойида қўлга олинган.
Жиноят ишини тергов қилиш жараёнида Галявиев дастлаб ақли норасо деб топилган, бироқ иккинчи экспертиза унинг ақли жойида эканини кўрсатган.
Аввалроқ Россиянинг Перм давлат университетида оммавий қотиллик содир этган собиқ талаба Тимур Бекмансуров умрбод қамоқ жазосига ҳукм қилинган эди. Шунингдек, айбланувчи ҳалок бўлганлар ва жароҳатланганларнинг оилаларига 18 миллион 300 минг рубль товон пули тўлаши керак.
2021 йилнинг 20 сентябрь куни Тимур Бекмансуров ўзи таҳсил олаётган Перм давлат миллий тадқиқот университети ҳудудида отишма содир этган. Ҳодиса оқибатида олти киши ҳалок бўлган, 40 дан ортиқ одам жароҳатланган. Ҳибсга олиш вақтида Бекмансуров яраланган, кейинроқ жароҳати оқибатида унинг оёғи кесиб ташланган.
Изоҳ (0)