Покистон мудофаа вазири Хаваж Осиф “Толибон” ҳукуматини агар улар Покистонга қарши жангарилар фаолиятини жиловлай олмаса, Афғонистон ичидаги террорчилар бошпаналарига зарба бериши ҳақида огоҳлантирди. Бу ҳақда “Дарё”нинг Афғонистондаги мухбири хабар бермоқда.
Осиф ОАВга берган интервьюсида айтишича, Покистон расмийлари Кобулга ташрифлари чоғида “Толибон”га чегара хавфсизлиги бўйича мажбуриятларини эслатишган, шунингдек, улар Афғонистон ҳудудидан Покистонга ҳужум учун фойдаланишларига йўл қўймаслигни бир неча бор таъкидлаган.
“Агар мажбуриятлар бажарилмаса, биз айрим чораларни қўллашга мажбур бўламиз, бу эса Афғонистоннинг қаерида террорчилар бошпанаси бўлса, шу ерга юқори аниқликда зарба беришни англатади, чунки биз бу вазиятга узоқ вақт тоқат қилолмаймиз”, — дейди Осиф.
У шунингдек, Покистон собиқ бош вазири Имрон Хонни Покистондаги толиблар билан Афғонистондаги толиблар орасида муносабатлар кучайишига рухсат бергани учун танқид қилиб, бу террорчиларнинг қайта фаоллашишига имкон берганини айтди.
Эслатиб ўтамиз, Афғонистонда “Толибон” ҳаракати ҳукумат тепасига келганидан кейин Покистондаги толиблар бошчилигида кўплаб терактлар содир этилган.
Исломободда жойлашган Тинчлик тадқиқотлари институти ҳисоботига кўра, Покистонда 2022 йилда камида 262 та теракт қайд этилган бўлиб, шундан камида 89 таси учун Покистондаги толиблар жавобгарликни зиммасига олган.
Изоҳ (0)