Шимолий Корея Япон денгизи томон баллистик ракета учирди. Бу ҳақда Жанубий Корея Қуролли кучлари штаб бошлиқлари бирлашган қўмитаси 13 апрелга ўтар кечаси хабар берди. Кейинроқ Yonhap агентлиги яна Жанубий Корея ҳарбийларига таяниб, КХДР ўрта ёки узоқ масофага мўлжалланган янги ракетасини синовдан ўтказаётган бўлиши мумкинлигини қўшимча қилди.
Япония ҳукумати маҳаллий вақт билан тахминан соат 8:00 да Хоккайдо ороли шимолидаги аҳолидан бошпаналарга беркинишни сўради: хавфсизлик тизими КХДР ракетаси оролга ёки унинг яқинига тушиши мумкинлигини башорат қилган. Тез орада сигнал бекор қилинди — Токиодагилар прогноз хато чиққанини ва Шимолий Корея ракетаси денгизга қулаганини айтишди. Бош вазир Фумио Кисида ракета учирилиши муносабати билан Япония Миллий хавфсизлик кенгашининг йиғилиш ўтказиш режасини маълум қилди.
10 апрель куни Шимолий Корея раҳбари Ким Чен Ин мамлакатнинг олий ҳарбий раҳбарлари билан учрашув ўтказган эди. У Шимолий Кореянинг ядровий арсеналини янада “амалий ва ҳужумкор” тарзда мустаҳкамлашга ваъда берган. Бу ҳаракатлар Кимнинг таъбири билан айтганда, рақибларининг “аҳмоқона” ҳарбий машқлари фонида амалга оширилмоқда.
Шимолий Корея АҚШ—Жанубий Кореянинг ҳарбий машғулотлари фонида фаоллашди
23 март куни Жанубий Корея ва АҚШнинг 10 кун давом этган энг йирик қўшма ҳарбий машғулотлари якунланган эди. Ушбу машқлар давомида Пхеньян бир ҳафта давомида денгизга камида бешта ракетани, шу жумладан камида битта узоқ масофали ракетани учирди.
Шунингдек, Пхеньян ядро қуролини олиб юришга қодир бўлган янги сувости дронини муваффақиятли синовдан ўтказганини, бу қурол сув остида портлаб “ўта кучли радиоактив сунами”ни келтириб чиқариши мумкинлигини маълум қилди. Бироқ Жанубий Корея ва АҚШ таҳлилчилари Пхеньян да бундай қуроллар борлигига шубҳа билан қарамоқда.
2022 йилда Шимолий Корея 50 дан ортиқ ракета синовлари ўтказган.
Изоҳ (0)