Россияда сўровда қатнашган ҳар олтинчи иш берувчи меҳнат муҳожирларини ишга олади, улар кўпинча Ўзбекистон, Тожикистон ва Қирғизистон фуқароларидир. Бу ҳақда HeadHunter тадқиқотларига таяниб, “ТАСС” хабар бермоқда.
“Hh.ru” тадқиқоти шуни кўрсатдики, сўровда қатнашган россиялик иш берувчиларнинг 16 фоизи меҳнат муҳожирларини ёллайди. Аксарият ҳолларда (76 фоиз) бундай иш берувчилар ойига 10 кишигача мигрант билан ишлайди.
Маълум бўлишича, россиялик иш берувчилар кўпинча Ўзбекистон (компанияларнинг 56 фоизи), Тожикистон (55 фоиз) ва Қирғизистон (53 фоиз) фуқароларини ишга олишади.
Сўров натижаларига кўра, Россия компанияларининг 61 фоизи меҳнат муҳожирларини махсус кўникмаларни талаб қилмайдиган лавозимларга ёллайди. Шунингдек, компанияларнинг 59 фоизи жисмоний меҳнат ва касб тажрибаси билан боғлиқ лавозимларга мигрантларни олишга тайёр.
Ҳар ўнинчи иш берувчи чет эл фуқароларидан таълим тўғрисидаги ҳужжатларни сўрайди, компанияларнинг 5 фоизи учун аввалги иш жойларидан тавсиялар ҳам муҳимдир.
Таҳлил натижаларига кўра, 59 фоиз россиялик иш берувчилар меҳнат муҳожирларини маҳаллий аҳолига қараганда камроқ пул сўрагани учун ишга олади.
Ҳар иккинчи респондент (54 фоиз) меҳнат муҳожирлари маҳаллий аҳоли учун мос бўлмаган шароитларда ишлашга рози, деб жавоб берган.
Уларнинг 37 фоизи эса мигрантларни кадрлар етишмайдиган ҳар қандай ишга ёллаш кераклигини таъкидлаган. Суҳбатда қатнашганларнинг ярмидан кўпи (60 фоиз) “ўз минтақаларида меҳнат муҳожирлари жуда кўп” деб ҳисоблаган.
Сўровлар 2023 йилнинг 18 мартидан 3 апрелига қадар 2198 нафар россиялик иш изловчи ва 483 нафар иш берувчи компаниялар ўртасида ўтказилди.
Изоҳ (0)