Хитой ҳарбий машқлар давомида Тайванга зарба беришни машқ қилди (видео)

Хитой Тайван яқинида уч кунлик ҳарбий машғулотларни бошлади, унинг қуролли кучлари машғулотлар давомида оролни ўраб олиш бўйича операцияни ишлаб чиқади. Бу ҳақда Reuters хабар берди.

Маълум қилинишича, машқлар 10 апрель, душанба кунга қадар давом этади. 9 апрель, якшанба куни Хитой қуролли кучлари Тайванга зарба беришни симуляция қилди. Хитой бу машқларни Тайван ва “ташқи кучлар” учун “қаттиқ огоҳлантириш” деб атамоқда.

Машғулотга самолёт ташувчи кема, ҳарбий кемалар, авиация ва турли ракета тизимлари жалб қилинган. Бошқа турдаги қурол ва техникалар, жумладан, электрон уруш самолётлари ва бомбардимончи авиатехника ҳам иштирок этиши кутилмоқда.

Ўз навбатида, BBC Хитойнинг ҳарбий машғулотлари Тайван президенти Цай Инвеннинг 6 апрель куни АҚШ Сенат палатаси спикери Кевин Маккарти билан учрашиш учун АҚШга қилган сафарига жавоб бўлиши мумкинлигини тахмин қилмоқда.

9 апрель куни Тайван ҳарбийлари ҳарбий машғулотлар пайтида оролга яқинлашаётган Хитой Халқ озодлик армиясининг 70 та самолёти ва 11 та кемасини пайқаган. Reuters 20 га яқин ҳарбий кемалар – Хитой армиясининг 10 га яқини ва Тайваннинг 10 таси шартли чегара вазифасини ўтайдиган Тайван бўғозининг медиан чизиғи яқинида жойлашганини хабар қилмоқда. Иккала томон ҳам провокацион манёврлар амалга оширмаяпти.

Тайван Мудофаа вазирлиги уларнинг қуролли кучлари можарони кучайтирмаслигини ва Хитойнинг ҳарбий машқларига тўғри жавоб беришини маълум қилди. Хитойнинг “Шандонг” авиаташувчи кемаси ҳозирда Тайван жануби-шарқий қирғоқларидан 400 денгиз милидан ортиқ масофада жойлашган бўлиб, у машқларда қатнашмоқда.

Хитой Ҳарбий фанлар академияси ходими Чжао Сяочжуонинг сўзларига кўра, Хитой Тайвандаги асосий нишонларга зарба бериш машқлари ҳақида биринчи марта очиқ гапирмоқда.

“Бу нишонлар қаторига турли инфратузилма объектлари, масалан, ҳаво йўлаклари, ҳарбий логистика обектлари ва зарурат туғилганда бир йўла йўқ қилиниши мумкин бўлган бошқа нишонлар киради”, — дейди у.

Айни вақтда АҚШнинг оролдаги элчихонаси Қўшма Штатлар минтақада тинчлик ва барқарорликни сақлаш учун барча имкониятларга эга эканини билдирди.