Хитойда йирик молиявий компания вице-президенти коррупцияда айбланмоқда

Хитой Коммунистик партиясининг Марказий тартиб-интизом комиссияси China Great Wall Asset Management молия компанияси вице-президенти, компаниянинг партияга аъзо вакили Ху Сяоганга қарши коррупция ва порахўрлик айби билан расмий тергов бошлади.

Компания муаммоли қарзларни бошқариш бўйича мамлакатдаги энг йирик операторлардан бири ҳисобланади ва давлат томонидан назорат қилинади. Муаммоли қарзларни бошқариш бўйича яна иккита етакчи оператор — China Huarong Asset Management ва China Cinda Asset Management компаниялари ҳам ҳукумат томонидан назорат қилинади.

Компаниялар 1997 йилги Осиё молиявий инқирозидан сўнг қарздорликни бартараф этиш учун тузилган. Bloomberg ва The Standard маълумотларига кўра, ушбу компаниялар бошқарувидаги қарзларнинг умумий миқдори қарийб 700 миллиард долларни ташкил этади.

Коммунистик партия Марказий қўмитаси тартиб-интизом комиссиясининг баёнотида айтилишича, партия аъзоси бўлган 57 ёшли Ху Сяогань «партия интизоми ва қонунларини жиддий бузганликда» гумон қилинмоқда. Сяоган содир этган ҳаракатлар тўғрисида батафсил маълумот ошкор қилинмаган.

Ушбу тергов ХХР молия секторидаги 2018 йилдан бери энг йирик терговлардан бири ҳисобланади. Ўшанда China Huarong Asset Management молия компаниясининг собиқ раҳбари Лай Сяоминга қарши шундай иш олиб борилган. Лайни текшириш 2018 йил апрель ойида бошланган, шу билан бирга у компания раислигидан озод қилиниб, Хитой Коммунистик партиясидан чиқарилган, 2018 йил октябрь ойида эса судга тортилган.

Текширув давомида Лай Сяомин пора бериш ва олиш, шунингдек, давлат мулкини ўзлаштириш билан бир неча бор партия интизоми ва мамлакат қонунларини жиддий равишда бузгани аниқланган.