Янги тайинланган Тошкент шаҳар ҳокими Шавкат Умрзоқов “Дарё” мухбирига берган интервьюсида пойтахтнинг дренаж тизими ўрганиб чиқилгани, ёғингарчилик пайтида кўчаларни нега сув босганини изоҳлади.
Тошкент шаҳрига Хитойда ишлаб чиқарилган 233 та автобус ва электробуслар олиб келинди. Янги транспорт воситалари тақдимотидан сўнг, шаҳар ҳокими Шавкат Умрзоқов электробусда сайр қилиб, журналистлар билан мулоқотда бўлди. Жумладан, ҳоким сўнгги вақтда пойтахтда кузатилаётган ёғингарчилик сабабли кўчаларни сув босаётгани тўғрисидаги саволга жавоб қайтарди.
“Дренаж тизимини ўргандим. Бунда инсонларда, айтайлик, ўзимизда ҳам айб бор. Шаҳардаги 20-30 фоиз дренажларни фуқаролар қурилиш жараёнида бузиб юборган. Буларнинг ҳаммасини ўрганишлар давомида аниқладик. Энди бузилган дренажларни қандай тиклашни, эртага бундай қонунбузилишга йўл қўйган инсонларга қандай жазо чоралари кўрилишини ўйлаяпмиз. Ахир бу давлат мулки ҳисобланади. Инсонлар сув тошди, дейди. Аҳамият беринглар, нега сув тошди? Биринчидан, кўча асфалт бўлди ва сув шиммади. Одамлар уй қуряпти. Қурмаса ҳам ёзиб юборади. Қурмоқчиман, рухсат беришмаяпти, деб. Қурилиш учун шароитлар қилиб берилган. Лекин аҳоли қурилиш маданиятига риоя қилиб қуриши керак. Ер остидан ўтган дренаж тизимларини ёпиб юбормаслик зарур”, — деди ҳоким.
Ижтимоий тармоқларда 2 апрель куни Тошкентда кузатилган ёғингарчилик сабаб кўплаб кўча ва метро бекатларини сув босгани акс этган видеолар тарқалганди.
Шундан сўнг, пойтахт ҳокимлиги ёмғир сувлари нима сабабдан кўчаларга тошиб кетганига изоҳ берган.
“Тошкент шаҳридаги лотокларнинг ўртача диаметри 300 ммга тенг. Улар ёғингарчилик сувларини коллекторлар ва каналларга етказади. 2 апрель куни 2 соат давомида кузатилган кучли ёғингарчилик натижасида 20 мм ёмғир ёғди ва бу апрель ойи учун белгиланган умумий меъёрнинг, яъни 60 ммнинг учдан бир қисмига тенг. Лотоклар бир пайтнинг ўзида бундай катта оқимни қабул қилишга мўлжалланмагани боис, шаҳримиздаги бир неча манзилгоҳларда сув тўпланиши кузатилди.
Бу ҳолатни тезкорлик билан бартараф этиш мақсадида, Тошкент шаҳар Ободонлаштириш бош бошқармаси ва унинг туман бошқармалари, коммунал соҳа тизимлари, Фавқулодда вазиятлар бошқармаси ҳамда Ички ишлар бош бошқармасининг 500 дан ортиқ ходимлари ва 100 дан ортиқ махсус техникалари жалб этилиб, 23:00 гача барча манзиллардаги ҳолатлар бартараф этилди”, — дея изоҳ берган ҳокимлик ахборот хизмати.
Изоҳ (0)