Бухоро вилояти Жондор туманида касб-ҳунар мактаби ўқувчиси ўзганинг хонадонидан 27,6 миллион сўм ўғирлади. Бу ҳақда Бухоро вилояти Ички ишлар бошқармаси ахборот хизматига таяниб, O‘zА хабар берди.
Қайд этилишича, 11 март куни номаълум шахс соат 19:00 дан 23:00 га қадар бўлган вақт мобайнида Жондор тумани “Қозоқон” маҳалласида яшовчи фуқаронинг яшаш уйига ғайриқонуний равишда кириб, ётоқхонасидаги темир сейфни калит танлаш йўли билан очган. Натижада сейф ичидаги 27 миллион 600 минг сўм пулни ўғирлаб, воқеа жойидан яширинган.
Мазкур ҳолат юзасидан туман ИИБ томонидан номаълум шахсга нисбатан Жиноят кодексининг тегишли моддаси билан жиноят иши қўзғатилиб, олиб борилган тезкор-техник ва суриштирув ҳамда тергов ҳаракатлари давомида ушбу жиноятни, шу маҳаллада яшовчи, 2006 йилда туғилган тумандаги касб-ҳунар мактаби 2-босқич ўқувчиси М.Ф. содир этгани аниқланган.
Ҳозирги кунда ушбу шахснинг вилоят ҳудудларида содир этилган бошқа шу турдаги фош этилмасдан қолаётган жиноятларга алоқадорлигини аниқлаш юзасидан дастлабки тергов ҳамда тезкор суриштирув ҳаракатлари давом этмоқда.
Бундан олдин, Самарқандда банкоматни ўмармоқчи бўлган уч киши қўлга олингани, Тошкентда ўзгалар хонадонида ўғрилик қилган шахс 9,3 йилга озодликдан маҳрум этилгани, Тошкент шаҳрида 2 февраль куни 20 ёшли йигит эҳсон қутисини ўғирлаб кетгани тўғрисида хабар берилганди.
Изоҳ (0)