Ўзбекистон россияликлар май байрамларни ўтказишни истайдиган топ-5 давлатлар қаторидан ўрин олди

Ўзбекистон Россия фуқаролари май ойидаги байрамларни ўтказишни истайдиган топ-5 давлатлар қаторидан ўрин олди, деб хабар беради “ТАСС”.

Саёҳатларни ташкиллаштириш ва консерж-хизматларни кўрсатишга ихтисослашган RS TLS компаниясининг маълумотларига кўра, Россия фуқаролари май байрамларини асосан Минскда ўтказишни режа қилган. “Кўпчилик Беларусь пойтахтига харидлар, маҳаллий ресторанлардаги мазали егуликлар, шунингдек, диққатга сазовор масканлар учун йўл олмоқчи”, — деб ёзади тадқиқот муаллифлари.

Рўйхатнинг иккинчи ўрнидан ўзининг тоғли курортлари билан Қозоғистон ўрин олган. “Арманистон ва Грузияга гастрономик саёҳатлар жорий баҳорда ҳам россияликлар орасида ўз машҳурлигини йўқотмаяпти”, — дейилади хабарда.

Сайёҳлик йўналишларида топ-5 ликка Ўзбекистон якун ясамоқда. Экспертларнинг фикрича, Россия фуқаролари мамлакатга диққатга сазовор тарихий масканларни томоша қилиш учун келмоқчи.

Апрель бошларида Ўзбекистон россияликлар иш излаётган энг машҳур мамлакатлар орасига киргани маълум бўлганди. Янги иш учун мамлакатни тарк этишга тайёр бўлган россияликлар орасида ариза берувчилар улуши 58 фоизгача ўсди (2020 йилда 47 фоиз).

Прогнозлаштириш ва макроиқтисодий тадқиқотлар институти маълумотларига кўра, 2017—2022 йилларда Ўзбекистонга келган чет эллик сайёҳлар сони деярли 2 баробар ошган. Агар 2017 йилда уларнинг сони 2,7 миллион нафарни ташкил қилган бўлса, 2022 йилда бу кўрсаткич 5,2 миллион нафарга етган. Дам олиш ва ҳордиқ чиқариш мақсадида Ўзбекистонга энг кўп чет эллик фуқаролар Россия (37,6 фоиз), Қозоғистон (11,2 фоиз) ва Туркиядан (6,3 фоиз) келган.