O‘zbekiston rossiyaliklar may bayramlarni o‘tkazishni istaydigan top-5 davlatlar qatoridan o‘rin oldi

O‘zbekiston Rossiya fuqarolari may oyidagi bayramlarni o‘tkazishni istaydigan top-5 davlatlar qatoridan o‘rin oldi, deb xabar beradi “TASS”.

Sayohatlarni tashkillashtirish va konserj-xizmatlarni ko‘rsatishga ixtisoslashgan RS TLS kompaniyasining ma’lumotlariga ko‘ra, Rossiya fuqarolari may bayramlarini asosan Minskda o‘tkazishni reja qilgan. “Ko‘pchilik Belarus poytaxtiga xaridlar, mahalliy restoranlardagi mazali yeguliklar, shuningdek, diqqatga sazovor maskanlar uchun yo‘l olmoqchi”, — deb yozadi tadqiqot mualliflari.

Ro‘yxatning ikkinchi o‘rnidan o‘zining tog‘li kurortlari bilan Qozog‘iston o‘rin olgan. “Armaniston va Gruziyaga gastronomik sayohatlar joriy bahorda ham rossiyaliklar orasida o‘z mashhurligini yo‘qotmayapti”, — deyiladi xabarda.

Sayyohlik yo‘nalishlarida top-5 likka O‘zbekiston yakun yasamoqda. Ekspertlarning fikricha, Rossiya fuqarolari mamlakatga diqqatga sazovor tarixiy maskanlarni tomosha qilish uchun kelmoqchi.

Aprel boshlarida O‘zbekiston rossiyaliklar ish izlayotgan eng mashhur mamlakatlar orasiga kirgani ma’lum bo‘lgandi. Yangi ish uchun mamlakatni tark etishga tayyor bo‘lgan rossiyaliklar orasida ariza beruvchilar ulushi 58 foizgacha o‘sdi (2020-yilda 47 foiz).

Prognozlashtirish va makroiqtisodiy tadqiqotlar instituti ma’lumotlariga ko‘ra, 2017—2022-yillarda O‘zbekistonga kelgan chet ellik sayyohlar soni deyarli 2 barobar oshgan. Agar 2017-yilda ularning soni 2,7 million nafarni tashkil qilgan bo‘lsa, 2022-yilda bu ko‘rsatkich 5,2 million nafarga yetgan. Dam olish va hordiq chiqarish maqsadida O‘zbekistonga eng ko‘p chet ellik fuqarolar Rossiya (37,6 foiz), Qozog‘iston (11,2 foiz) va Turkiyadan (6,3 foiz) kelgan.